AQSh prezidenti Donald Tramp nafaqat siyosati, balki avtomobillarga bo‘lgan qiziqishi bilan ham tanilgan. U yillar davomida superkarlar, limuzinlar va klassik hashamatli mashinalardan iborat katta kolleksiya to‘plagan.
Kursiv Qozog‘iston to‘plagan ma’lumotlarga ko‘ra, uning mashinalari umumiy qiymati $2 mlndan oshadi. Bu faqat ochiq manbalarda ma’lum bo‘lgan avtomobillar hisobiga kiritilgan summa.
Tramp bilan bog‘liq eng ko‘zga ko‘ringan mashinalar
Kolleksiyadagi eng mashhur modellardan biri Rolls-Royce Phantom hisoblanadi. Bu hashamatli sedan yuqori darajadagi qulaylik va sokin yurishi bilan ajralib turadi.
Shuningdek, 1956-yilda ishlab chiqarilgan klassik Rolls-Royce Silver Cloud ham bor. Bunday avtomobillar narxi holatiga qarab $150 mingdan $300 minggacha yetadi.
Italiyaning afsonaviy Lamborghini Diablo VT Roadster modeli ham Tramp kolleksiyasida bo‘lgan. Bu V12 dvigatelli superkar bozorda $200–240 ming atrofida baholanadi.
Ferrari F430 ham uning garajida bo‘lgan mashinalardan biri. 4,3 litrli V8 dvigatelga ega bu sportkar $130 mingdan $315 minggacha narxda sotiladi. Ayrim nusxalari auksionlarda yuqori bahoda taklif qilingan.
Tramp Cadillac Allanté va maxsus bezatilgan Cadillac Trump Golden Series limuziniga ham ega bo‘lgan. Ushbu limuzinda salon ichida oltin bezaklar qo‘llanilgan.
Chevrolet Camaro SS ham kolleksiyadan joy olgan. 6,2 litrli V8 dvigatelga ega bu mashina amerikalik muscle car klassikasidir.
Katta hajmli Cadillac Escalade SUV ham uning sevimli avtomobillaridan biri hisoblanadi.
Qiziq tomoni shundaki, kolleksiyada elektromobil ham bor. Ular orasida ilk Tesla Roadster modeli qayd etilgan.
Ta’kidlash kerak, mashinalarning aksariyati Tramp prezident bo‘lishidan oldin xarid qilingan. Prezidentlik davrida xavfsizlik qoidalari sabab u odatda avtomobillarni shaxsan boshqarmaydi.
Umuman olganda, Trampning avtokolleksiyasi amerika klassikasi, Yevropa hashamati va noyob tarixiy modellarning uyg‘unlashuvidan iborat. Bu shunchaki boy odamning garaji emas, balki kolleksionerlar va avtoishqibozlar uchun qiziqarli to‘plam hisoblanadi.
Eslatib o‘tamiz, avvalroq Arkadag‘ budjetining 11 foiziga teng bo‘lgan Berdimuhamedov garajida qanday avtomobillar borligi haqida ma’lumot berilgandi. Ma’lumotga ko‘ra, uning garaji noyob giperkarlardan tortib, zirhli limuzinlargacha bo‘lgan mashinalarni o‘z ichiga olgan muzeyni eslatadi.
