Janubiy koreyaning mashhur K-pop guruhi Blackpink YouTube tarixida 100 million obunachiga ega bo‘lgan birinchi musiqiy ijrochiga aylandi. Bu haqda Afisha Daily xabar berdi.
Guruhga platformaning eng nufuzli mukofotlaridan biri — «Qizil brilliant tugma» topshirildi.
Mazkur mukofot hozircha 20 tadan kam kanalda mavjud. Ular orasida T-Series, MrBeast, Cocomelon, Like Nastya, Vlad and Niki, SET India, WWE hamda Kids Diana Show bor. Ushbu mukofotni birinchi bo‘lib qo‘lga kiritgan kanal — T-Series bo‘lgan. 2019-yilda esa mashhur bloger PewDiePie ham ushbu tugmaga sazovor bo‘lgan.
Yangi mini-albom — Deadline
Guruhning yangi Deadline nomli mini-albomi 27-fevral kuni chiqadi. Albomdan Jump nomli raqs-pop singli ham o‘rin olgan. Ushbu qo‘shiq iyul oyida e’lon qilingan bo‘lib, so‘nggi uch yildagi guruhning ilk qo‘shma relizi hisoblanadi. Jump 2025-yilning eng yaxshi K-pop qo‘shiqlari reytingida Apple Music talqiniga ko‘ra yetakchilik qilgan.
A’zolar kinoda ham faol
Ayni paytda guruh a’zolari ham kino sohasida o‘zini sinab ko‘rmoqda. Jisoo Netflix platformasining «Paren po vizovu» dramasida rol ijro etadi. U unda virtual tanishuv xizmati orqali kundalik hayotdan qochishga urinadigan veb-tun prodyuseri obrazini gavdalantiradi.
Lisa esa The White Lotus prodyuseri David Bernad suratga olayotgan romantik komediyada ishtirok etadi. Film g‘oyasi aktrisalar tomonidan birgalikda ishlab chiqilgan bo‘lib, ular sevimli filmi — Notting Hill haqida suhbat davomida ushbu loyihani o‘ylab topgan.
Avvalroq Kursiv Uzbekistan «Gremmi» mukofotining 2026-yilgi g‘oliblari aniqlangani haqida yozgandi.
