Yaqinda taqdim etilgan Volvo XC70 gibrid modeli CarNewsChina nashri tomonidan test-drayv qilindi. Model bir qator imkoniyat va qulayliklarga ega.
Maqolada quyidagilar haqida so‘z boradi:
- Model va bozordagi o‘rni
- Dizayn va tashqi ko‘rinish
- Salon va texnologiyalar
- Texnik imkoniyatlar va yurish xususiyatlari
- Afzalliklar va kamchiliklar
- Narx
Model va bozordagi o‘rni
Ushbu avtomobil brendning SMA super gibrid platformasiga asoslangan ilk seriyali modeli hisoblanadi. Model XC60 va XC90 oralig‘ida joylashib, o‘rta hajmli premium SUV segmentida raqobatni kuchaytiradi. U, ayniqsa, Xitoy bozorida mahalliy elektromobillar bilan kurashish uchun ishlab chiqilgan, ammo keyinchalik 70 dan ortiq mamlakatlarga eksport qilinishi rejalashtirilgan.
Dizayn va tashqi ko‘rinish
XC70 dizaynida Volvo‘ning klassik uslubi saqlab qolingan. Old qismida yopiq panjara va faol havo kirish tizimi qo‘llangan. «Tor bolg‘asi» uslubidagi matritsali LED faralar harakat sharoitiga mos ravishda avtomatik sozlanadi. Avtomobil uzunligi 4,8 metrga yaqin bo‘lib, bu uni segmentdagi yirik modellardan biriga aylantiradi. Orqa chiroqlar esa o‘zgacha shaklda ishlab chiqilgan. Bu esa modelning global dizayn identifikatsiyasini mustahkamlaydi.
Salon va texnologiyalar
Ichki qism zamonaviy va minimalistik uslubda yaratilgan. Markazda 15,4 dyuymli sensor ekran, haydovchi oldida esa 12,3 dyuymli raqamli panel joylashgan. Bundan tashqari, kengaytirilgan reallik asosidagi head-up display ham mavjud. Avtomobil to‘rt zonali ovozli boshqaruv, sun’iy intellekt yordamida marshrut rejalash va simsiz Apple CarPlay bilan jihozlangan. Ovoz tizimi 23 karnayli Harman Kardon akustikasi orqali ishlaydi.
Texnik imkoniyatlar va yurish xususiyatlari
XC70 gibrid tizimi 1,5 litrli turbo dvigatel va bir nechta elektromotorlardan iborat. Umumiy quvvat 234 kVt dan 340 kVt gacha yetadi. 0 dan 100 km/soatgacha tezlanish taxminan 5,3 soniyani tashkil etadi. Batareya sig‘imi 21,2 kWh va 39,6 kWh variantlarda taqdim qilingan. Eng katta batareya bilan 200 km dan ortiq elektr yurish masofasi va umumiy 1200 km gacha zaxira ta’minlanadi. Tezkor zaryadlashda 80 foizgacha to‘ldirish 23 daqiqa atrofida amalga oshadi.
Yurishda avtomobil silliq tezlanish va barqaror boshqaruvni taklif qiladi. Osma tizimi Yevropa uslubida sozlangan. Bu esa yo‘l notekisliklarini yaxshi yutadi va ayni paytda boshqaruv aniqligini saqlaydi.
Afzalliklar va kamchiliklar
Modelning asosiy ustunligi katta batareya va uzoq yurish masofasidir. Shuningdek, uchta elektromotorli tizim uni segmentdagi ko‘plab gibridlardan ajratib turadi. Biroq ayrim kamchiliklar ham mavjud. Masalan, past tezlikda rekuperatsiya tizimi bir oz notekis ishlaydi. Yuqori tezlikda esa shamol shovqini sezilishi mumkin.
Shuningdek, dastlabki partiyadagi ayrim avtomobillar texnik nuqson sababli qaytarib olingani ishlab chiqarish sifatini yanada takomillashtirish zarurligini ko‘rsatadi.
Narx va raqobatchilar
XC70 Xitoy bozorida 269,9 ming yuandan 349,9 ming yuangacha narxda taklif qilinmoqda. Bu taxminan $37 mingdan $48 minggacha bo‘lgan diapazonni anglatadi. Ushbu narx segmentida u Li Auto L7, Aito M7 va BYD Tang kabi modellarga raqobatchi hisoblanadi.
Eslatib o‘tamiz, Kursiv Uzbekistan nashri Volvo 40 mingta elektromobilni qaytarib olishi haqida yozgan edi.
