Xitoyning Xiaomi kompaniyasi avtomobil yo‘nalishida ilk patent mojarosiga duch keldi. CarNewsChina nashrining yozishicha, ish bo‘yicha tinglov 26-mart kuni bo‘lib o‘tadi.
Da’vo Shandong Yanlu New Energy Vehicle kompaniyasi tomonidan berilgan. Ushbu kompaniya arzon elektr avtomobillar ishlab chiqaradi.
Da’vo uchta dizayn patentiga tegishli. Ular old faralar, old bamper va orqa bamper elementlarini o‘z ichiga oladi. Mazkur dizaynlar Xiaomi SU7 va Xiaomi YU7 modellarida qo‘llanilgani aytilmoqda.
Patentlardan biri 2023-yil yanvarda topshirilgan. U 2025-yil mart oyida tasdiqlangan. Odatda bunday jarayon 6 – 8 oy davom etadi. Xiaomi patent kuchini tekshirtirish uchun alohida ekspertiza ham o‘tkazgan. Natijada patent yangilik va ixtiro darajasi bo‘yicha haqiqiy deb topilgan.
Qonunga ko‘ra, har qanday shaxs yoki kompaniya patentni bekor qilishni so‘rashi mumkin. Shu sababli ish rasmiy ko‘rib chiqilmoqda. Bu Xiaomi Auto uchun ilk ochiq patent mojarosi hisoblanadi. Kompaniya avtomobil bozoriga yaqinda kirib kelgan.
Shu bilan birga, SU7 modeli bozorda muvaffaqiyatli sotilmoqda. U 2025-yilda sotuv hajmi bo‘yicha Tesla Model 3 dan ham o‘tib ketgan.
Eslatib o‘tamiz, Kursiv Uzbekistan yangi Xiaomi SU7’da qanday muammolar borligi haqida yozgan edi.
