Samsung Galaxy S25 Edge smartfoni Rossiya bozorida sezilarli darajada arzonlashdi. Avval $1,2 ming atrofida sotilgan model endi $700 dan taklif qilinmoqda.
Galaxy S25 Edge 2025-yilda kompaniyaning eng yupqa flagmanlaridan biri sifatida taqdim etilgan edi. Uning korpusi atigi 5,8 mm qalinlikka ega. Biroq model ommaviy xaridorlar orasida kutilgan darajada mashhur bo‘lmadi. Bunga uning yuqori boshlang‘ich narxi va ayrim texnik cheklovlari sabab bo‘lgan.
Smartfon imkoniyatlari bo‘yicha bazaviy Galaxy S25 modeliga yaqin edi. Ammo narxi premium Ultra versiyasiga yaqin belgilangan. Natijada Galaxy S25 Edge tor auditoriyaga mo‘ljallangan qurilma bo‘lib qoldi. Samsung esa ushbu liniyaning ikkinchi avlodini davom ettirmagani aytilmoqda.
Hozir modelning asosiy ustunliklari sifatida yupqa korpus, LTPO OLED displey va QuadHD aniqlik ko‘rsatilmoqda. Smartfon Snapdragon 8 Elite protsessorida ishlaydi. Unda 200 MP asosiy kamera va 12 MP qo‘shimcha kamera mavjud.
Shuningdek, qurilma stereo dinamiklar va sun’iy intellekt funksiyalariga ega Samsung interfeysi bilan taklif qilinadi. Asosiy kamchiliklardan biri akkumulator sig‘imi bo‘lib qolmoqda. Galaxy S25 Edge 3900 mA/soat akkumulator bilan jihozlangan.
Eslatib o‘tamiz, Kursiv Uzbekistan nashri Samsung Galaxy M36 uchun One UI 8.5 yangilanishi chiqarilgani haqida yozgan edi.
