Belarusdan O‘zbekistonga ilk «Slavyan karvoni» blok-poyezdi yo‘lga qo‘yildi

Belarus va O‘zbekiston o‘rtasida «Slavyan karvoni» nomli ilk to‘g‘ridan to‘g‘ri blok-poyezd qatnovi yo‘lga qo‘yildi. Bu haqda «O‘ztemiryo‘lkonteyner» xabar berdi.

Yangi logistika yo‘nalishi ikki davlat o‘rtasida yuklarni yetkazib berish muddatini 5 – 7 kungacha qisqartirishi kutilmoqda.

Qatnov prezident topshirig‘i asosida tashkil etildi

Unga ko‘ra, mazkur blok-poyezdni yo‘lga qo‘yish vazifasi Shavkat Mirziyoyevning Belarusga davlat tashrifi chog‘ida belgilangan edi.

30-iyul kuni poyezd Belarusdagi Orsha-Vostochnaya stansiyasidan yo‘lga chiqib, Toshkent viloyatidagi Chuqursoy stansiyasiga yo‘l oldi.

71 vagonda turli mahsulotlar tashilmoqda

Blok-poyezd tarkibi 71 shartli vagondan iborat bo‘lib, unda yog‘ochni qayta ishlash sanoati mahsulotlari, shakar, oziq-ovqat mahsulotlari, omixta yem va boshqa turdagi yuklar tashilmoqda.

Qatnov oyiga ikki marta amalga oshiriladi

Dastlabki bosqichda «Slavyan karvoni» blok-poyezdini oyiga ikki marta qatnatish rejalashtirilgan.

Avvalroq Kursiv Uzbekistan 3-avgust kuni qator poyezdlar qatnovi bekor qilinishi haqida yozgandi.