O‘zbekiston prezidenti Shavkat Mirziyoyev Issiqko‘lda suv-motor sporti bo‘yicha Qirg‘iziston Gran-prisining ochilish marosimida ishtirok etdi. Tadbir Markaziy Osiyo va Ozarbayjon davlat rahbarlarining norasmiy Maslahat uchrashuvi doirasida o‘tkazildi.
Marosimda O‘zbekiston, Qirg‘iziston, Qozog‘iston va Tojikiston prezidentlari ishtirok etdi. Davlat rahbarlari musobaqa qatnashchilari va mehmonlarini qutladi.
Shavkat Mirziyoyev rafiqasi bilan birga sportchilarning saralash poygasini kuzatdi.
Gran-pri F1H2O chempionatining ikkinchi bosqichi hisoblanadi
Qirg‘iziston Gran-prisi Xalqaro suv-motor sporti ittifoqi shafeligida o‘tkazilmoqda. U «suvdagi Formula-1» nomi bilan tanilgan F1H2O jahon chempionatining ikkinchi bosqichi hisoblanadi.
Musobaqalarda har yili turli davlatlardan professional jamoalar va sportchilar qatnashadi.
Jahon chempionati bosqichi mintaqada ilk bor o‘tkazilmoqda
F1H2O jahon chempionati bosqichi Markaziy Osiyoda birinchi marta tashkil etilmoqda.
Musobaqa dasturidan mashg‘ulotlar, saralash bosqichi va asosiy poyga o‘rin olgan. Asosiy bahslarda tezyurar qayiqlar soatiga 220 kilometrdan ortiq tezlikda harakatlanadi.
Eslatib o‘tamiz, avvalroq Markaziy Osiyo va Ozarbayjon yetakchilari Issiqko‘lda yangi besh yulduzli mehmonxonani ochgani haqida xabar berilgandi. Marosim davomida yetakchilar mehmonxona majmuasida dam oluvchilar hamda xalqaro forum va uchrashuvlarni o‘tkazish uchun yaratilgan sharoitlar bilan tanishdi.
