O‘zbekiston va AQSh «Artemida» bitimlari doirasidagi hamkorlikni rivojlantiradi

O‘zbekiston prezidenti Shavkat Mirziyoyev 19-oktabr kuni AQSh Davlat kotibi Marko Rubio bilan uchrashdi. Tomonlar strategik sheriklikni mustahkamlash, savdo va investitsiyalarni kengaytirish hamda xavfsizlik sohasidagi hamkorlikni muhokama qildi. Uchrashuv doirasidagi Ishbilarmonlik va investitsiya kengashi yig‘ilishida 12 milliard dollarlik yangi kelishuvlarga erishildi. Bu haqda O‘zbekiston prezidenti matbuot xizmati xabar berdi.

O‘zbekiston va AQSh strategik sheriklikni mustahkamlamoqda

Uchrashuv avvalida Marko Rubio AQSh Prezidenti Donald Trampning samimiy salomi va ezgu tilaklarini Shavkat Mirziyoyevga yetkazdi.

Muloqotda oliy darajada erishilgan kelishuvlarni izchil amalga oshirish, siyosiy va xavfsizlik sohasidagi hamkorlikni kengaytirish masalalariga e’tibor qaratildi. Tomonlar «C5+1» formatidagi navbatdagi vazirlar uchrashuvi yakunlarini ham yuqori baholadi.

Ikki mamlakat parlamentlari va idoralari o‘rtasidagi muloqot, shuningdek, ishbilarmon doiralar va akademik hamjamiyat aloqalari kengayib borayotgani qayd etildi.

Tovar ayirboshlash hajmi 35 foizga oshdi

Prezident matbuot xizmati ma’lumotiga ko‘ra, 2026-yil boshidan buyon O‘zbekiston va AQSh o‘rtasidagi o‘zaro tovar ayirboshlash hajmi 35 foizga oshgan.

Fuqaro aviatsiyasi, avtomobilsozlik, konchilik, energetika, qishloq xo‘jaligi, raqamlashtirish va moliya sohalarida qo‘shma loyihalar amalga oshirilmoqda. Ishbilarmonlik va investitsiya kengashining 19-oktabrdagi yig‘ilishida esa 12 milliard dollarlik yangi kelishuvlarga erishilgan.

Xavfsizlik va texnologiyalar bo‘yicha hamkorlik

Tomonlar terrorizm, ekstremizm, narkotik moddalarning noqonuniy aylanmasi va noqonuniy migratsiyaga qarshi kurashish bo‘yicha hamkorlikni mustahkamlash masalalarini muhokama qildi.

Shuningdek, strategik ahamiyatga ega muhim minerallar, energetika, transport, sun’iy intellekt va raqamli texnologiyalar sohalaridagi hamkorlik istiqbollari ko‘rib chiqildi.

O‘zbekiston va AQSh o‘rtasida Kengaytirilgan strategik sheriklik muloqoti yo‘lga qo‘yilgani ham qayd etildi. Uning birinchi yig‘ilishi yakunida koinotni tinch maqsadlarda o‘zlashtirish bo‘yicha «Artemida» bitimlari ham imzolangan.

Ta’lim va turizm aloqalari kengaymoqda

Gumanitar hamkorlik doirasida Toshkentdagi Webster universiteti, Amerika texnologiyalar universiteti va Kolorado konchilik maktabining kompetensiyalar markazi faoliyati tilga olindi.

Shuningdek, O‘zbekistonga tashrif buyurayotgan amerikalik sayyohlar soni ortib borayotgani qayd etildi. Tomonlar hududlararo aloqalarni rivojlantirish va ishbilarmon delegatsiyalarning o‘zaro tashriflarini yo‘lga qo‘yish masalalariga ham e’tibor qaratdi.

Avvalroq O‘zbekiston prezidenti Shavkat Mirziyoyev Samarqandda Tojikiston, Qirg‘iziston va Qozog‘iston tashqi ishlar vazirlari bilan uchrashib, savdo, energetika, transport va sanoat sohalaridagi hamkorlikni kengaytirish masalalarini muhokama qilgandi.