Masjid milliy moddiy-madaniy meros ro‘yxatiga kiritilgan
Qashqadaryo viloyatining Kasba tumanidagi Sulton Mir Haydar majmuasiga qarashli eskirgan «Namozgoh» masjidi yil oxirigacha tiklanadi, yozadi Madaniy meros agentligi matbuot xizmati.
«Namozgoh» masjidi milliy moddiy-madaniy meros ro‘yxatiga kiritilgan.
Avvalroq, tarmoqda foydalanuvchilar masjid vayrona holatda ekanligi, rasmiylar XIV asr yodgorligini saqlab qolish uchun hech qanday chora ko‘rmayotgani haqida yozishgan edi.
Agentlikning taʼkidlashicha, meʼmoriy yodgorlik 2023-yilga moʻljallangan restavratsiya rejasiga kiritilgan. Ayni paytda mutaxassislar dastlabki loyiha hujjati va restavratsiya qilish uchun ekspert xulosasi ustida ishlamoqda.
