Qozog‘iston O‘zbekistondan afg‘onlar uchun un tranzit tariflarini pasaytirishni so‘radi
Qozog‘iston qozoq uni va don mahsulotlarini O‘zbekiston hududi orqali Afg‘onistonga temir yo‘l orqali tashish tariflarini pasaytirishni so‘radi. Bu haqda Bosh vazir o‘rinbosarlari Serik Jumangarin va Jamshid Xo‘jayev ishtirokida bo‘lib o‘tgan ikki davlat ishchi guruhlari yig‘ilishida ma’lum bo‘ldi.
Joriy yilning 6 oyi davomida O‘zbekiston orqali Afg‘onistonga 275 ming tonna mahsulot tashildi. Yig‘ilishda eng katta yuk tashish hajmi 2017-yilda qayd etilgani – o‘shanda Qozog‘iston Respublikasi O‘zbekiston orqali Afg‘onistonga 1209 ming tonna eksport qilgani ma’lum qilindi. Keyingi yillarda esa hajmlar kamaydi – 2021 yilda 536 ming tonnaga, 2022 yilda esa 816 ming tonnagacha.
Muzokaralar natijasida ishtirokchilar chora-tadbirlar ishlab chiqish va maqbul tariflarni belgilash bo‘yicha ishchi guruh tuzishga qaror qildi.
Bundan tashqari, tomonlar nazorat-o‘tkazish punktining o‘tkazish qobiliyatini oshirish, Qozog‘iston ko‘mirini O‘zbekistonga tashish tariflarini oshirish va Xitoy-Qozog‘iston-O‘zbekiston-Turkmaniston-Eron multimodal koridorini faollashtirishga qaror qildi.
Qozog‘istonlik mutaxassis Qozibek Omarovning prognoziga ko‘ra, Qozog‘iston Respublikasi 2023 yilning kuziga qadar O‘zbekistonga un va bug‘doy eksportini 3,80-3,85 million tonnagacha oshirishi mumkin.
