Uzum O‘zbekistondagi eng yirik soliq to‘lovchilardan biriga aylandi

«Uzum» ekotizimi Oʻzbekistondagi eng yirik xususiy soliq toʻlovchilardan biriga aylandi, deb xabar qildi kompaniya matbuot xizmati «Kursiv»ga.

Joriy yilning o‘n oyi yakunlariga ko‘ra Uzum respublika byudjetiga 650 milliard so‘mga yaqin mablag‘ o‘tkazdi.

Bugungi kunda ekotizim korxonalarida 8 mingdan ortiq ishchi ishlaydi, kelasi yili Uzum yana 5 mingta ish o‘rni yaratmoqchi.

«Uzum» korxonasi asoschisi va bosh direktori Jasur Jumayev ekotizim 300 million dollar jalb etish bo‘yicha dasturning birinchi bosqichini amalga oshirganini, investitsiyalar omborxonalar tashkil etish, buyurtmalarni qabul qilish punktlari, yangi xizmatlarni yo‘lga qo‘yish imkonini berishini ta’kidladi.

Eslatib o‘tamiz, yaqin kunlarda «Uzum bank» to‘lovni bo‘lib-bo‘lib to‘lashni taklif qiladi.

Avvalroq, «Kursiv» xorijiy sarmoyani jalb qilish Uzum va O‘zbekiston iqtisodiyotiga nima olib kelishi haqida yozgan edi.