O‘zbekiston Istiqbolli loyihalar milliy agentligi (ILMA) Binance kriptobirjasidan jarima undirish uchun sudga murojaat qilishga tayyor. Bu haqda ILMA direktorining birinchi o‘rinbosari Vyacheslav Pak 6-fevral kuni bo‘lib o‘tgan matbuot anjumanida ma’lum qildi.
Eslatib o‘tamiz, avvalroq birja 102 million so‘m jarimaga tortilgan edi. Bu bir qator qonunbuzarliklar tufayli sodir bo’ldi. Huquqbuzarliklar orasida O‘zbekistonda yuridik shaxsning, shuningdek, mamlakat ichida serverlarida elektron platformaning yo‘qligi, anonim aktivlar bilan operatsiyalarni amalga oshirish (O‘zRda bu taqiqlangan) kabilar bor.
Vyacheslav Pakning so’zlariga ko’ra, Binance jarimani to’lashdan bosh tortgan, shuning uchun ILMA bu masala bo’yicha sudga da’vo qiladi. Qaror qabul qilingandan so’ng, tartibga soluvchi tashkilot joylashgan yurisdiktsiyadagi rasmiy kanallar orqali qarorning ijrosini talab qiladi. Chet el kriptobirjasi Kayman orollaridagi offshor zonada ro’yxatdan o’tgan.
ILMA vakili 2023-yil 1-yanvardan boshlab O‘zR qonunlariga ko‘ra, respublika fuqarolari kriptoaktivlarni faqat milliy provayderlar orqali sotib olish va sotish huquqiga ega ekanligini eslatib o‘tdi. Vyacheslav Pakning so’zlariga ko’ra, xorijiy platformalar KYC tartibi, jinoiy faoliyatdan olingan daromadlarni legallashtirish, terrorizmni moliyalashtirishga qarshi kurashish nuqtai nazaridan etika va boshqalar talablariga javob bermaydi, shuningdek, fuqarolarning huquq va manfaatlarini himoya qilishni ta’minlamaydi.
«Masalan, ertaga ushbu platforma bloklansa, fuqaro shikoyatlarni qayerga yuboradi? Shu bois, bu chora, birinchi navbatda, fuqarolarni turli firibgar loyihalardan cheklash, ularning huquqlari poymol etilishining oldini olishga qaratilgan, chunki respublikada barcha me’yoriy-huquqiy baza yaratilgani bois, ushbu turdagi xizmatlarni ko‘rsatuvchi rasmiy provayderlar mavjud», — dedi ILMA vakili.
Eslatib o‘tamiz, O‘zbekistonda nafaqat Binance, balki boshqa kriptobirjalar ham veb-saytlari yopilgan. Regulyator uni 2022-yilda blokirovka qilishga qaror qildi. ILMA buni nafaqat fuqarolar manfaatlarini himoya qilish istagi, balki mamlakatdan valyuta chiqib ketishining oldini olish, shuningdek, milliy bozorni rivojlantirish imkoniyati bilan izohladi.
