Fitch O‘zbekiston reytingini «BB-» darajasida tasdiqladi

Fitch xalqaro reyting agentligi O‘zbekistonning uzoq muddatli IDR (xorijiy valyutadagi emitent defolti) reytingini barqaror prognoz bilan «BB-» darajasida tasdiqladi, deyiladi tashkilot saytida.

«BB» reytinglari, ayniqsa, noqulay iqtisodiy sharoitlar yuzaga kelganda, defolt xavfiga nisbatan zaiflikni ko’rsatadi. Shu bilan birga, agentlik majburiyatlarni bajarishga yordam beradigan moliyaviy va biznes imkoniyatlari mavjudligi haqida xabar beradi.

Fitch O‘zbekistonda davlat qarzining pastligi va iqtisodiyotning «rekord yuqori o‘sish sur’atlari»ni qayd etdi. Shu bilan birga, u tovarlarga bog’liqlik va «tarkibiy zaif tomonlar», jumladan: aholi jon boshiga yalpi ichki mahsulot (YaIM) pastligi, raqobatbardoshlikning yo’qligi va davlatning bozorda sezilarli mavjudligiga ishora qiladi.

«O‘zbekiston hukumati asosiy tarkibiy iqtisodiy islohotlarni amalga oshirishda muvaffaqiyatga erishmoqda. (…) Fitch ularni muvaffaqiyatli amalga oshirish uzoq muddatli davlat moliyasiga foyda keltirishiga ishonadi», — deyiladi hisobotda.

Agentlik O‘zbekistondagi byudjet taqchilligi haqida ham gapirdi. Fitch ma’lumotlariga ko’ra, u 2023-yilda YaIMning 5,5 foizigacha o’sgan. Biroq, energiya subsidiyalarining qisqarishi tufayli bu ko‘rsatkich 2024-yilda 4,3 foizga, 2025-yilda esa 3,9 foizga tushishi kutilmoqda.

«O‘zbekiston iqtisodiyoti Ukrainadagi urush oqibatlari va Rossiya sanksiyalariga chidamliligini isbotlashda davom etmoqda, o‘sish sur’atlari MDH davlatlari orasida eng yuqori ko‘rsatkichlar qatorida», — deya qo‘shimcha qildi Fitch.

«Kursiv» avvalroq Fitch O‘zbekistondagi iqtisodiy islohotlarning borishini qanday baholashi haqida batafsil yozgan edi.