Mobil raqam onlayn auksionda 1 milliard soʻmdan koʻproqqa sotildi

20-mart kuni onlayn-auksionda mobil telefon raqami 1,07 milliard soʻmga sotildi, deb xabar bermoqda Oʻzbekiston respublika tovar-xomashyo birjasi.

Bu mobilraqam.uzex.uz orqali raqamlar sotuvi boshlanganidan beri rekord koʻrsatkichga aylandi.

Lotning boshlangʻich bahosi 200 million soʻmni tashkil etdi. Kim oshdi savdosi uch soat davom etdi va shu vaqt ichida narx besh baravar oshib, 1,07 milliard soʻmga yetdi.

Raqam uchun oʻn nafar nomzod kurash olib bordi. Tovar-xomashyo birjasi maʼlumotlariga koʻra, tanlov gʻolibi oʻn kun ichida raqamni roʻyxatdan oʻtkazishi shart.

Savdo platformasi xabarida kim oshdi savdosida sotilgan raqam koʻrsatilmagan.

Avvalroq «Kursiv» oʻzbekistonliklar chiroyli avtomobil raqamlarini sotib olish uchun deyarli 400 milliard soʻm sarflagani haqida xabar bergan edi.