Xiaomi 14 Ultra Oʻzbekistonda 25-apreldan sotuvga chiqdi

O‘zbekistonda 25-aprel kuni Xiaomi 14 Ultra flagman smartfoni sotuvga chiqdi. Bu haqda «Kursiv»ga kompaniya matbuot xizmati xabar berdi. Taqdimot Toshkentdagi Intercontinental mehmonxonasida bo‘lib o‘tdi.

Xiaomi 14 Ultra yumaloq kamera moduliga, tekis orqa panelga, soddalashtirilgan dizaynga ega va ikkita klassik rangda mavjud – qora va oq.

U qanday xususiyatlarga ega?

Smartfon to‘rtta kamera bilan sekundiga 30 kadr tezlikda 8K piksellar sonida suratga olishi mumkin. Bu xususiyatlar smartfon mobil suratga olish sohasida yetakchi ekanligini ko‘rsatadi. Leica optikasi va 50 megapikselli sensorga ega bo‘lib, u 8K videoni misli ko‘rilmagan aniqlikda yozib oladi va bu professional tahrirlashni osonlashtiradi. Smartfon 16 GB + 512 GB konfiguratsiyada mavjud.

«Xiaomi 14 Ultra smartfoni ishonchli Xiaomi Guardian Structure strukturasiga asoslanib, oʻta mustahkam alyuminiy ramka, nanotexnologik eko-charm va Xiaomi Shield Glass oynasidan iborat. Yagona alyuminiy blokdan yaratilgan Xiaomi 14 Ultraʻning ramkasi 1,38 barobar yuqori mustahkamlikka ega. Nanotexnologik eko-charm maxsus ishlab chiqilgan yangi formulaga ega, buning natijasida u yupqaroq va yengilroq boʻlib, zarbalarga qarshiligi 6 barobarga oshdi», deyiladi kompaniya press-relizida.

Smartfonni qayerdan sotib olish mumkin?

Ushbu smartfonni Credit Asia, Texnomart, Idea do‘konlar tarmog‘i, Mediapark, Mi Store, Imkon, Radius Mobile, Joybox’dan xarid qilish mumkin.

Avvalroq «Kursiv» Xiaomi aksiyalari aprel oyi boshida kompaniya tomonidan chiqarilgan birinchi elektromobil sotuvi boshlanishi fonida qimmatlashganini yozgan edi.