Dunyodagi eng qadimgi jurnal brendlaridan biri boʻlgan Tatler Qozogʻiston, Markaziy Osiyo va Turkiy dunyo mamlakatlari bozoriga kirib kelmoqda

Tatler jurnali Qozogʻiston, Ozarbayjon, Oʻzbekiston va Turkiya bozorlariga chiqadi. Jurnalni Qozog‘istonda ochishga ruxsat berildi. Etakchi media platformalardan biri Tatler Asia va Timur Turlovning Turlov Private Holding ltd. bu borada kelishib oldi. Qozogʻistonda jurnalning birinchi soni 2024-yil dekabr oyida chop etiladi.

Tatler jurnali 1709-yilda Buyuk Britaniyada tashkil etilgan boʻlib, bugungi kunda faoliyat yuritayotgan eng qadimgi jurnallardan biri hisoblanadi. Tatler Asia 1977-yilda tashkil topgan boʻlib, Gonkong, Singapur, Malayziya, Filippin, Tailand, Makao, Xitoy, Tayvan va Vyetnam kabi toʻqqizta mamlakatda nashr etiladi. U Osiyoning yangi avlod tadbirkorlari, madaniyat arboblari va inflyuyenserlari haqidagi eng muhim jurnallardan biri hisoblanadi.

Turlovning ta’kidlashicha, Qozogʻiston bugungi kunda kreativlikning global markazlaridan biriga aylangan va Tatler jurnalining tanlovi buni yaqqol isbotlaydi.

«Dunyodagi eng qadimgi jurnal brendlaridan biri boʻlgan Tatler aynan bizning jamoamizni va Qozogʻistonni tanlaganidan faxrlanamiz, shuningdek, bizga Turkiy dunyo kabi katta mintaqani ishonib topshirilganidan ham xursandmiz. Bu, albatta, qozogʻistonlik mutaxassislarning professionalligi va Turkiy dunyoda media sohasida yetakchilikka tayyor ekanini isbotlaydi. Biz Qozogʻistonni namunali mamlakat, ya’ni kreativlik, moda, turmush tarzi va xatti-harakatlarning global markazlaridan biri sifatida qabul qilamiz», dedi Turlov.

Tatler Asia bosh direktori va direktorlar kengashi raisi Mishel Lamunyer aytishicha, Timur Turlov bilan hamkorlik Tatler Asia tarixi va butun qit‘a bo‘ylab kengayishida muhim bosqich bo‘ladi. «Men qozog‘istonlik jamoa bilan yaqin hamkorlik qilib, innovatsion mahsulotlarimiz va kreativ xizmatlarimizni Qozogʻiston va mintaqaning boshqa mamlakatlariga olib borish imkoniyatini intiqlik bilan kutyapman», dedi u.

Jurnalning qogʻoz shaklidagi qozoq tilli versiyasi yiliga oʻn marta chop etiladi. Shu bilan birga, Tatler Kazakhstan sayti qozoq va rus tillarida ishga tushiriladi, ijtimoiy tarmoqlar va YouTubeʻda sahifalar yaratiladi. 2025-yilda Tatler Türkiye jurnalining qogʻoz va elektron versiyalari chop etiladi, keyinchalik Tatler Azerbaijan va Tatler Uzbekistan jurnallari nashr etiladi. Tatler Kazakhstan, Tatler Türkiye, Tatler Azerbaijan va Tatler Uzbekistan jurnallari Turlov Private Holding ltd. kompaniyasi tomonidan boshqariladi, Timur Turlov esa Kuzatuv kengashi raisi lavozimida ishlaydi.

Nikolay Uskov tarix fanlari nomzodi, taniqli jurnalist, muharrir va yozuvchi, avvallari GQ va Forbes kabi mashhur nashrlarga rahbarlik qilgan boʻlib, 2022-yildan buyon Turlovning media loyihalariga maslahatchi sifatida ishlab kelmoqda. U Tatler Kazakhstan jurnalining muharrir direktori etib tayinlandi.

Aleksandr Vorotilov Tatler Kazakhstan kuzatuv kengashi a’zosi etib tayinlandi. Vorotilov taniqli qozogʻistonlik jurnalist, muharrir va mediamenejer hisoblanadi. U Forbes Kazakhstan jurnalini ishga tushirish va Kursiv Media yetakchi biznes gazetasi va saytini qayta ishga tushirishda ishtirok etgan. Vorotilov Turlovning media masalalari boʻyicha maslahatchisi hisoblanadi.

Tatler Kazakhstan’ning bosh direktori lavozimiga Marina Gazizova-Yakovleva tayinlandi. Marina Olmaotada tugʻilgan va faoliyatini jurnalist sifatida boshlagan, keyinchalik mamlakatning yetakchi banklaridan birida jamoatchilik bilan aloqalar boʻlimiga boshchilik qilgan. Shundan soʻng u oʻz kommunikatsiya agentligini tashkil etgan va soʻnggi uch yil davomida muvaffaqiyatli boshqarib kelgan.

Timur Turlov – Qozogʻistondagi yirik tadbirkor boʻlib, uning boyligi $3,9 mlrddan oshadi. U Freedom Holding Corp. kompaniyasining asoschisidir. Bu xolding moliyaviy xizmatlar bozorining turli sohalarida faoliyat yurituvchi kompaniya hisoblanadi. Kompaniyaning faoliyat doirasiga brokerlik xizmatlari, qimmatli qogʻozlar bilan savdo, investitsiyaviy maslahat, investitsiyaviy banking, ipoteka, sugʻurta, telekommunikatsiya, onlayn-savdo (aviachiptalar, madaniy va sport tadbirlariga chiptalar) va onlayn supermarket kabi xizmatlar kiradi. Freedom Holding kompaniyasining aksiyalari NASDAQ birjasida savdo qilinadi.

2022-yil oxirida biznes, madaniyat, sport va ta’lim sohalariga qiziqishi kuchli boʻlgan Turlov Qozogʻiston shaxmat federatsiyasiga rahbarlik qila boshladi. Shuningdek, u yoshlar oʻrtasida futbolni rivojlantirishga qaratilgan Qozogʻistonning QJ yoshlar futbol ligasiga asos solgan.