Samsung kompaniyasi yangi «Galaxy Easy Compensation» dasturini e’lon qildi, bu dastur orqali foydalanuvchilar eski Galaxy smartfonlarini sotish imkoniyatiga ega bo’lishadi. Eng muhimi, bu jarayon yangi telefon sotib olishni talab qilmaydi, ya’ni foydalanuvchilar faqatgina o‘z eski qurilmalarini sotish orqali kompensatsiya oladilar.
«Galaxy Easy Compensation» dasturi dastlab 14-yanvardan Janubiy Koreyada ishga tushadi va asta-sekin boshqa mamlakatlarga ham tarqaladi. Dastur doirasida Galaxy S23, Galaxy S22, Galaxy S21, Galaxy S20, Galaxy Z Fold5, Galaxy Z Fold4, Galaxy Z Fold3, Galaxy Z Flip5, Galaxy Z Flip4 va Galaxy Z Flip3 seriyalaridagi telefonlarni qaytarish mumkin.
Foydalanuvchi eski telefonini sotishga qaror qilganda, Samsungning rasmiy saytida taklif qilingan narxni tekshirib, ariza bera oladi. So‘ngra, telefon kuryer orqali yuboriladi va mutaxassis tomonidan tekshirilib, uchta kategoriya: «A’lo», «Yaxshi» yoki «Qayta ishlash» bo‘yicha ajratiladi. Foydalanuvchiga yakuniy narx taklif etiladi.
Janubiy Koreyada bu dastur Likewize kompaniyasi bilan hamkorlikda amalga oshiriladi. Likewize, ishlatilgan telefonlarni yig’ish va tovon to’lash jarayonini boshqaradi.
Avvalroq Kursiv Uzbekistan Samsung kompaniyasi Galaxy S25 smartfoniga Qualcomm chipini oʻrnatishi haqida xabar bergan edik.
