General Motors Ekvadorda 2027-yilgi Chevrolet Traverse Z71 krossoverini rasman namoyish qildi, deya xabar berdi GM Authority. Model 2026-yilgi Guayakil avtosalonida taqdim etildi va yaqin haftalarda mamlakat bozorida sotuvga chiqarilishi kutilmoqda.
Yangi Chevrolet Traverse Z71 Ekvadorda Chevrolet brendining 100 yilligi munosabati bilan o‘tkazilgan tadbirlar doirasida namoyish etildi.
Bu Chevrolet’ning mahalliy bozordagi eng yirik uch qatorli krossoverlaridan biri bo‘ladi. Ekvador GM’ning Janubiy Amerikadagi Tinch okeani klasterida ushbu modelni taqdim etgan to‘rtinchi davlat bo‘ldi. Avvalroq Traverse Z71 Kolumbiya, Chili va Peruda ham sotuvga chiqarilgan.
Model faqat bitta versiyada taklif etiladi
Ekvadorda 2027-yilgi Traverse faqat Z71 komplektatsiyasida sotiladi. Ushbu versiya yo‘lsiz hududlarda harakatlanishga moslashtirilgan va standart to‘liq uzatma tizimiga ega.
Model Chevrolet’ning AQShdan import qilinadigan premium SUV’lari qatoriga qo‘shiladi. Ushbu safda Tahoe va Suburban ham mavjud.
Traverse Z71 tashqi ko‘rinishidagi yirik dizayni, shuningdek, yo‘ldan tashqarida harakatlanish imkoniyatlari bilan ajralib turadi.
Sotuvlar yaqin haftalarda boshlanadi
Chevrolet Traverse Z71’ning Ekvador uchun aniq jihozlari va komplektatsiyasi sotuvlar boshlanishiga yaqinroq e’lon qilinadi.
Avtomobillar AQShning Michigan shtatidagi Lansing Delta Township zavodidan yetkazib beriladi. Ushbu korxona Traverse modelini ishlab chiqaradigan GM’ning dunyodagi yagona zavodi hisoblanadi.
Eslatib o‘tamiz, avvalroq Chevrolet sug‘urtasi eng arzon brendlar qatoriga kirgani haqida xabar berilgandi. Buick, Chevrolet va GMC 2026-yilda AQShda sug‘urta xarajatlari nisbatan past bo‘lgan avtomobil brendlari qatoridan joy oldi. Consumer Reports va Insurify ma’lumotlariga ko‘ra, Cadillac esa General Motors tarkibidagi eng qimmat sug‘urtalanadigan brendlardan biri bo‘ldi.
