Yevropa ligasi doirasida Frankfurtning «Ayntraxt» jamoasiga qarshi o‘yinda (2:0) Eldor Shomurodov zaxiradan maydonga tushib, gol urdi. Bu natija «Roma» bosh murabbiyi Klaudio Ranerining hujumchi bo‘yicha fikrlarini yana bir bor tasdiqladi. Bu haqda Sports.ru nashri ma’lum qildi.
O‘yindan so‘ng Sky Sport Italia telekanaliga bergan intervyusida Raneri Shomurodovning jamoada qolishini aytdi:
«Men unga biz bilan qolishini aytdim. Barcha yigitlar va muxlislar uni yaxshi ko‘rishadi, chunki u bor kuchini beradi. Men u bilan allaqachon «Kalyari»da ishlaganman. U har doim tabassum qiladi, garchi ba’zida u meni jahlga ham keltiradi! Hatto unga: «Agar sen ketsang, men kimdan jahlim chiqaman?» deb hazillashdim. Men uni yaxshi ko‘raman va u bu narsani biladi.»
Avvalroq Kursiv Uzbekistan Eldor Shomurodov «Roma»ni tark etishi mumkinligi haqida xabar bergan edi.
