BMW X3 G48 modeli kengaytirilgan g‘ildirak bazasi bilan jihozlangan, 28-fevraldan boshlab Xitoy bozorida savdoga chiqadi. Bu haqda CarNewsChina nashri ma’lum qildi.
BMW-Brilliance qo‘shma korxonasi tomonidan ishlab chiqarilgan yangi model BMW X5 G05’ga o‘xshash g‘ildirak bazasiga ega bo‘lib, avtomobilning ichki va tashqi dizaynida zamonaviy qulayliklar va texnologiyalar joriy etilgan.
X3 G48 modeli o‘zining aniq o‘lchamlari – 4865 x 1920 x 1664 mm va 2975 mm g‘ildirak bazasi bilan jahon bozorlaridagi versiyalaridan 90 mm uzunroq va 30 mm kengroqdir. Ushbu parametrlar avtomobilning ikkinchi qatordagi yo‘lovchilari uchun yanada qulay joy taqdim etadi. M-Sport tashqi paketi esa avtomobilga o‘ziga xos uslub va agressiv ko‘rinish beradi.
Yangi X3 G48 interyerida D shaklidagi uch pog‘onali rul, 14,9 dyuymli katta displey va bosh ekrani joy olgan. Markaziy konsol simsiz telefon zaryadlash paneli, kristalli axborot-ko’ngilochar selektori va kichik vites tutqichi bilan jihozlangan. Shuningdek, avtomobilda katta lyuk, ikkinchi qatordagi yo‘lovchilar uchun qo‘shimcha iqlim nazorati va boshqa qulayliklar mavjud.
Xitoy bozorida BMW X3 2025 30Li to‘plamida taqdim etiladi. Avtomobil 190 kVt (255 ot kuchi) quvvatga ega 2 litrli turbo dvigatel bilan jihozlangan bo‘lib, ZF’ning 8 pog‘onali avtomatik uzatmalar qutisi va xDrive 4WD tizimiga ega. Shu bilan birga, BMW X3’ning asosiy darajadagi versiyasi 140 kVt (188 ot kuchi) ishlab chiqaradigan dvigatelga ega bo‘lishi kutilmoqda.
BMW X3 G48 modeli BMW-Brilliance’ning Shenyangdagi zavodida ishlab chiqarilgan. Bu zavod X1, X5, 3-Series va 5-Series kabi mashhur modellarning ishlab chiqarilishiga ham xizmat qiladi.
Avvalroq Kursiv Uzbekistan Xitoyda yangi BMW X3 cho‘zilgan versiyasi ishlab chiqarila boshlangani haqida xabar bergan edi.
