Dongfeng Honda kompaniyasi Xitoy bozoriga mo‘ljallangan yangi Honda S7 krossoverini taqdim etdi. O‘rta o‘lchamli bo‘lishiga qaramay, ushbu model keng g‘ildirak bazasiga ega. Bu haqda Autohome xabar berdi.
Honda S7 ning o‘lchamlari 4750 x 1930 x 1625 mm, g‘ildirak bazasi 2930 mm, minimal klirens 193 mm ni tashkil etadi. Yana bir g‘ayrioddiy xususiyat – orqa ko‘rinish oynalarining yo‘qligi: ularning o‘rniga kameralar o‘rnatilgan.
Model ikkita versiyada taqdim etilgan: asosiy versiya 272 ot kuchiga ega bitta elektromotor bilan jihozlangan bo‘lsa, kuchliroq variant ikki elektromotor bilan keladi va umumiy quvvati 476 ot kuchini tashkil etadi. Ikkinchi versiya 100 km/soat tezlikka atigi 4,6 soniyada erishadi.
Krossover zamonaviy texnologiyalar bilan jihozlangan. Unda 9,9 dyuymli ekranli raqamli asboblar paneli hamda 12,8 dyuymli ekranli media tizimi mavjud. Shuningdek, aqlli ovozli yordamchi va bosh suyanchig‘iga o‘rnatilgan Bose akustik tizimi kiritilgan.
Bundan tashqari, mashina iqlim tizimiga integratsiyalangan aromatik vosita va Honda Connect 4.0 tizimiga ega. Yana bir muhim jihat – haydovchiga yordam beruvchi ilg‘or Honda Sensing 360+ tizimining mavjudligidir.
Mashinaning akkumulyatori sig‘imi 89,8 kVt-soatni tashkil etadi. To‘liq zaryad bilan old g‘ildirakli versiya 650 km, to‘liq uzatmali versiya esa 620 km masofani bosib o‘ta oladi.
Kursiv Uzbekistan avvalroq Chevrolet’ning 2026-yilgi Equinox modeli va uning narxlari e’lon qilingani haqida xabar bergan edi.
