O‘rmonlar va degradatsiyaga uchragan yerlarni tiklash uchun $153 mln miqdorida moliyaviy yordam ajratiladi

eʼlon qilindi
O‘zbekiston va Jahon banki o‘rmonlar va degradatsiyaga uchragan yerlarni tiklash loyihasini boshladi / Foto: Ahmad Muhammadov / Kursiv Uzbekistan

Samarqand xalqaro iqlim forumi doirasida O‘zbekiston hukumati va Jahon banki hamkorligida «O‘zbekistonda barqaror landshaftlarni tiklash» loyihasi boshlanganini e’lon qildi. Mazkur loyiha Ekologiya, atrof-muhitni muhofaza qilish va iqlim o‘zgarishi vazirligi hamda O‘rmon xo‘jaligi agentligi bilan birgalikda amalga oshiriladi. Bu haqda Kursiv Uzbekistan muxbiri ma’lum qildi.

Jahon banki tomonidan ushbu loyiha uchun $153 mln miqdorida moliyaviy yordam ajratilishi belgilangan. Loyiha Markaziy Osiyoning beshta davlati – Qozog‘iston, Qirg‘iziston, Tojikiston, Turkmaniston va O‘zbekistonni qamrab olgan RESILAND CA+ dasturining tarkibiy qismi hisoblanadi.

Ushbu tashabbus O‘zbekiston o‘rmon xo‘jaligi tizimini 2030-yilgacha rivojlantirish strategiyasida belgilangan asosiy maqsadlar – o‘rmon maydonini 6,1 mln gektarga yetkazish va aholi turmush sharoitini yaxshilash, infratuzilmani rivojlantirish hamda yangi ish o‘rinlarini yaratishga xizmat qiladi. Loyiha doirasida 6 ta viloyatda – Jizzax, Qashqadaryo, Namangan, Samarqand, Surxondaryo va Sirdaryo hududlarida faoliyatlar olib boriladi.

Muayyan tadbirlarga quyidagilar kiradi:

  • degradatsiyaga uchragan yerlarni tiklash, daraxt va butazorlar ekish;
  • agroo‘rmonchilik va o‘rmon-yaylov tizimlarini rivojlantirish;
  • suv tejovchi texnologiyalarni joriy etish;
  • sanoatbop va dorivor o‘simliklar plantatsiyalarini tashkil etish;
  • ekoturizm infratuzilmasini yaratish;
  • o‘rmon resurslari monitoringi uchun axborot platformasini ishga tushirish.

Shuningdek, O‘zbekiston tarixida ilk bor yagona o‘rmon plantatsiyalari ma’lumotlar bazasi shakllantiriladi.

Loyiha Toshkentdagi Markaziy Osiyo atrof-muhit va iqlim o‘zgarishini o‘rganish universiteti («Green University») bilan hamkorlikda olib boriladi. Universitet va O‘rmon xo‘jaligi agentligi o‘rtasida ilmiy izlanishlar uchun grantlar ajratishni ko‘zda tutuvchi memorandum imzolandi.

Avvalroq Kursiv Uzbekistan mamlakat quyosh energiyasi bo‘yicha katta salohiyatga ega ekanligi haqida xabar bergan edi.

Shuningdek