Angliya Premer-ligasining 36-turida «Manchester Siti» turnir jadvalining quyi qismida joylashgan «Sautgempton» bilan 0:0 hisobida durang o‘ynadi. Uchrashuv davomida to‘liq ustunlikka ega bo‘lgan «shaharliklar» raqib darvozasini ishg‘ol eta olmadi.
To‘p nazorati va zarbalar natija bermadi
«Siti» o‘yinda 72 foiz to‘p nazoratiga ega bo‘lib, jami 640 ta pas amalga oshirdi. «Sautgempton» esa 28 foiz to‘p nazorati bilan 258 ta pas bajardi. Manchesterliklar 26 zarba yo‘llagan, biroq faqat 5 tasi darvoza tomon bo‘lgan. Mezbonlar esa bor-yo‘g‘i ikki marta zarba berdi va ularning hech biri darvozaga yo‘naltirilmagan.
Abduqodir Husanov yana tarkibda yo‘q
O‘zbekistonlik yosh himoyachi Abduqodir Husanov bu safar ham «Manchester Siti»ning o‘yin qaydnomasiga kiritilmadi. Fevral oyida klubning eng yaxshi futbolchisi deb topilgan Husanov 30-mart kuni Angliya kubogi chorak finalida «Bornmut»ga qarshi o‘yinda (2:1) maydonga tushgan va o‘sha uchrashuvda sariq kartochka olgan edi. Shundan buyon Husanov birorta ham bahsda maydonga tushmagan.
Bosh murabbiy Pep Gvardiola avvalroq «Husanovning vaqti hali keladi», degan edi.
Hal qiluvchi bosqich oldidan muhim yo‘qotish
«Siti» ayni paytda 65 ochko bilan turnir jadvalining uchinchi pog‘onasida bormoqda. Jamoani Chempionlar ligasi yo‘llanmasi uchun hal qiluvchi bahslar kutmoqda.
Avvalroq Kursiv Uzbekistan «shaharliklar» klubi 2024–2025-yilgi mavsumning eng yaxshi futbolchisini aniqlash uchun ovoz berish tizimini ishga tushirgani haqida xabar bergan edi.
