«Prezident iqtidorli farzandlari» tashabbusini amalga oshirish bo‘yicha milliy dastur amalga oshiriladi. Bu haqda prezident farmoni qabul qilindi.
Farmon bilan iqtidorli yoshlarni erta aniqlash va ularni har tomonlama qo‘llab-quvvatlash orqali inson kapitalini rivojlantirish hamda yoshlar bilan manzilli ishlash asosida global mehnat bozorida raqobatbardosh mutaxassislar tayyorlash ko‘zda tutilmoqda.
Shu munosabat bilan Ixtisoslashtirilgan ta’lim muassasalari agentligi tizimida Al-Beruniy nomidagi xalqaro maktab-internat tashkil etiladi. Bundan tashqari, Iqtidorli yoshlarni qo‘llab-quvvatlash hamjamiyati faoliyati yo‘lga qo‘yiladi.
Shuningdek, milliy dastur doirasida «Yorqin iste’dod» loyihasi bosqichma-bosqich amalga oshiriladi.
Loyihada har yili xorijiy oliy ta’lim muassasalarida o‘qish salohiyatiga ega bo‘lgan 1,5 ming nafargacha 9-sinf bitiruvchisi imtihon orqali saralab olinadi.
Saralangan o‘quvchilar agentlik tizimidagi maktablarning maslahatchilariga biriktiriladi. 10–11-sinflarda maxsus platforma orqali ular uchun qo‘shimcha o‘quv mashg‘ulotlari tashkil etiladi.
Avvalroq Kursiv Uzbekistan Al-Xorazmiy nomidagi yangi universitet tashkil etilishi haqida yozgandi.
