Rossiyaning S7 Airlines aviakompaniyasi 4-iyuldan boshlab Novosibirsk va Farg‘ona o‘rtasida muntazam aviaqatnovlarni qayta yo‘lga qo‘ymoqda. Bu haqda kompaniya rasmiy saytida ma’lum qildi.
Birinchi bosqichda reyslar haftada bir marta juma kunlari amalga oshiriladi. 2-sentabrdan boshlab esa parvozlar haftada ikki martaga seshanba va juma kunlariga belgilangan.
Parvoz vaqtlari:
- Novosibirskdan Farg‘onaga jo‘nash – 22:00 da, Farg‘onaga yetib kelish – 23:00 da (mahalliy vaqt bilan);
- Farg‘onadan qaytish – 00:20 da, Novosibirskga yetib kelish – 05:10 da.
2-sentabrdan boshlab seshanba kungi parvozlar uchun jadval o‘zgaradi:
- Novosibirskdan uchish – 18:30 da;
- Farg‘onadan jo‘nash – 20:50 da.
Uchishlar Boeing 737-800 samolyotlarida amalga oshiriladi va parvoz taxminan 3 soat davom etadi.
Avvalroq Kursiv Uzbekistan Xitoyning Guanchjou va Pekin shaharlaridan Toshkentga aviaqatnovlar yo‘lga qo‘yilgani haqida yozgandi.
