Samarqand shahrida qattiq maishiy chiqindilarni yoqish orqali elektr energiyasi ishlab chiqaruvchi zamonaviy zavod qurilishiga tamal toshi qo‘yildi. Bu haqda Chiqindilarni boshqarish va sirkulyar iqtisodiyotni rivojlantirish agentligi ma’lum qildi.
Loyiha Xitoyning «Shanghai SUS Environment» kompaniyasi tomonidan amalga oshiriladi. Zavod kuniga 1,5 ming tonna chiqindini qayta ishlaydi va yiliga 240 mln kVt/soat elektr energiyasi ishlab chiqaradi. Umumiy investitsiya hajmi $150 mlnni tashkil etadi va 200 ga yaqin yangi ish o‘rni yaratiladi.
Mazkur loyiha davlat rahbarining 2024-yil 24-martdagi PQ-118-son qarori asosida amalga oshirilmoqda. Tadbirkorlar, viloyat hokimligi va Ekologiya vazirligi vakillari ishtirokidagi marosimda qayd etilishicha, bu tashabbus ekologik muhofaza, chiqindilarni kamaytirish va qayta tiklanuvchi energiyadan foydalanish imkonini beradi.
Eslatib o‘tamiz, avvalroq chiqindi bilan bog‘liq eng ko‘p huquqbuzarlik Namanganda aniqlangani haqida yozgan edik.
