Namanganda qattiq maishiy chiqindilarni yoqib, ulardan elektr energiyasi olishga mo‘ljallangan zamonaviy zavod qurilishiga start berildi. Bu haqda Chiqindilarni boshqarish va sirkulyar iqtisodiyotni rivojlantirish agentligi xabar berdi.
China Everbright International kompaniyasi bilan imzolangan bitimga muvofiq, Namanganda chiqindilarni termik qayta ishlash orqali elektr energiyasi ishlab chiqarish bosqichma-bosqich yo‘lga qo‘yiladi.
29-noyabr kuni Chust tumanining Zarafshon mahallasida 10 gektarlik hududda zavodning tamal toshi qo‘yildi. Marosimda investorlar, viloyat hokimi, ekologiya va sektor mas’ullari, mahalla faollari hamda jamoatchilik ishtirok etdi.
Loyihaning umumiy qiymati $141,5 mln bo‘lib, zavod kuniga 1,5 ming tonna yoki yiliga 547 ming tonnagacha chiqindi qayta ishlaydi. Natijada yiliga 227,5 mln kVt/soat elektr energiyasi ishlab chiqariladi. Korxonada 150–200 ta yangi ish o‘rni yaratilishi rejalashtirilgan. Zavod 2027-yilda ishga tushiriladi.
Shartnomaga ko‘ra, ishlab chiqarilgan elektr energiyasi 30 yil davomida «O‘zenergosotish» AJga kafolatli tarzda sotiladi. Kelgusida Toshkent, Andijon, Farg‘ona, Qashqadaryo, Samarqand, Buxoro, Jizzax viloyatlari va Qoraqalpog‘iston Respublikasida ham shunday majmualar barpo etilishi rejalashtirilgan.
Avvalroq O‘zbekiston hududi bir oyda 422 ming tonnadan ortiq chiqindidan tozalangani xabar qilingandi. Ma’lumotga ko‘ra, 15-oktabrdan 15-noyabrgacha bo‘lgan davrda respublika bo‘ylab 422,4 ming tonna chiqindi yig‘ilib, olib chiqildi. Shu vaqt ichida 95,2 mingdan ortiq mahallalar hududi va 60,6 mingdan ziyod jamoat joylari tozalandi.
