Aave kriptokredit platformasidan 9 mlrd dollar chiqib ketdi

Aave kriptokredit platformasidan foydalanuvchilar qisqa vaqt ichida taxminan $9 mlrd mablag‘ni chiqarib oldi. Bu holat bozorda jiddiy ishonch inqirozini keltirib chiqargan.

Ma’lumotlarga ko‘ra, xakerlar platformada garov sifatida o‘g‘irlangan rsETH tokenlaridan foydalangan. Ularning qiymati taxminan $200 mln bo‘lgan. Shu orqali xakerlar yana $236 mln likvid tokenlarni qarzga olgan. Bu esa platformaning moliyaviy muvozanatiga ta’sir qilgan.

Muammo ildizi Kelp DAO deb nomlangan krosscheyn loyihadagi buzilish bilan bog‘liq. U yerda xakerlar 116,5 mingta rsETH tokenini o‘g‘irlagan. Ularning umumiy qiymati taxminan $300 mlnni tashkil etgan.

Shundan keyin investorlar orasida xavotir kuchaydi. Natijada, Aave platformasida jami aktivlar qiymati uchdan bir qismga kamayib, $17,5 mlrdga tushdi.

Aave rsETH bilan bog‘liq operatsiyalarni vaqtincha to‘xtatdi. Kompaniya token hali ham ta’minlanganini aytgan bo‘lsa-da, ehtiyot choralari saqlanib qolmoqda.

LayerZero ma’lumotiga ko‘ra, hujum ortida Shimoliy Koreyaga bog‘liq xakerlar turishi mumkin. Bu holat faqat bitta platforma bilan cheklanmadi. Ma’lumotlarga ko‘ra, DeFi kreditlash sektoridan 48 soat ichida jami $13 mlrd mablag‘ chiqib ketgan. Masalan, Morpho platformasidan ham $1 mlrddan ortiq mablag‘ olib chiqilgan.

Eslatib o‘tamiz, Kursiv Uzbekistan nashri O‘zbekistonda kripto-aktivlardan to‘lov vositasi sifatida foydalanish imkoniyati joriy etilishi haqida yozgan edi.