Yangi avtomobil xarid qilish ko‘pchilik uchun muhim qaror hisoblanadi. Ammo bozorda har doim ham o‘z narxiga arziydigan model topilavermaydi. 2026-yilda ayrim avtomobillar texnik muammolar, past ishonchlilik yoki eskirgan texnologiyalar sabab mutaxassislar tomonidan tavsiya etilmayapti.
Volkswagen ID Buzz
Volkswagen ID Buzz modeli zamonaviy dizayni va keng saloniga qaramay, kutilgan natijani bermaydi. Elektr yurish masofasi taxminan 377 km bilan cheklangan. Bu bugungi elektromobillar fonida past ko‘rsatkich hisoblanadi.
Bundan tashqari, narxi $60 mingdan yuqori bo‘lib, funksiyalariga nisbatan qimmat sanaladi. Model uchun muhim dasturiy yangilanishlar ham 2027-yilgacha kechiktirilgan.
Nissan Rogue
Nissan Rogue tashqi ko‘rinishi bilan e’tiborni tortadi. Biroq uning asosiy muammosi variator uzatmalar qutisida. Ko‘plab foydalanuvchilar CVT tizimidagi nosozliklar sabab qimmat ta’mirga duch kelmoqda. Shuningdek, modelning qayta sotuv qiymati past bo‘lib, uzoq muddatda foydali xarid hisoblanmaydi.
Ford Bronco Sport
Ford Bronco Sport reklamada yo‘ltanlamas sifatida ko‘rsatiladi. Ammo amalda u oddiy shahar krossoveri bo‘lib qolmoqda. Dvigatellari uncha kuchli emas va og‘ir sharoitlarga mos kelmaydi. Bundan tashqari, yig‘ilish sifati va ayrim komponentlarning ishonchliligi bo‘yicha shikoyatlar mavjud.
Chevrolet Silverado va Tahoe modellari
Chevrolet Silverado va Tahoe modellari LT1 dvigateli bilan bog‘liq muammolar sabab tanqid qilinmoqda. 6.2 litrli V8 motorlarda texnik nosozliklar qayd etilgan. Ishlab chiqaruvchi muammoni bartaraf etish o‘rniga faqat moyni tez-tez almashtirishni tavsiya qilgan. Bu esa foydalanuvchilar ishonchini pasaytirgan.
Nissan Leaf va Dodge Hornet
Nissan Leaf elektromobil bozorining ilk vakillaridan biri bo‘lsa-da, bugungi kunda eskirgan hisoblanadi. Uning zaryadlash tizimi zamonaviy standartlardan ortda qolgan. Bundan tashqari, batareya tez eskirishi bilan bog‘liq muammolar ham kuzatiladi.
Dodge Hornet sport krossover sifatida taqdim etilgan. Ammo ichki materiallar sifati va texnik nosozliklar model obro‘siga salbiy ta’sir ko‘rsatmoqda. Narxi pasaytirilganiga qaramay, u tez qiymatini yo‘qotadigan avtomobil sifatida baholanmoqda.
Eslatib o‘tamiz, Kursiv Uzbekistan nashri Chevrolet Onix narxidagi Volkswagen Jetta X avtomobili namoyish etilgani haqida yozgan edi.
