OTB 2025-yilda Markaziy Osiyo uchun qancha ajratdi

Osiyo taraqqiyot banki 2025-yilda o‘z resurslaridan $29,3 mlrd ajratdi. Bu ko‘rsatkich o‘tgan yilga nisbatan 20 foizga yuqori.

Bank mablag‘lari Osiyo va Tinch okeani mintaqasida iqtisodiy o‘sishni qo‘llab-quvvatlashga yo‘naltirildi. Shu orqali 3,3 mln dan ortiq ish o‘rinlari yaratilishi va 180 mln kishining hayoti yaxshilanishi kutilmoqda.

OTB prezidenti Masato Kanda bank misli ko‘rilmagan darajada yordam ko‘rsatganini ta’kidladi. Uning aytishicha, bu bankning tez va katta hajmda yordam berish imkoniyatini ko‘rsatadi.

Ajratilgan mablag‘lar kreditlar, grantlar, investitsiyalar va texnik yordamni o‘z ichiga oladi. Hamkorlar tomonidan yana $14,7 mlrd qo‘shimcha resurs jalb qilindi.

Pul oqimining katta qismi Janubiy Osiyoga yo‘naltirildi. Bu hudud $9,7 mlrd oldi. Janubi-Sharqiy Osiyo $9 mlrd, Markaziy va G‘arbiy Osiyo $8,3 mlrd mablag‘ oldi.

Xususiy sektorni rivojlantirish asosiy yo‘nalishlardan biri bo‘ldi. Bu soha uchun $5,5 mlrd ajratildi. Davlat sektoriga berilgan mablag‘larning yarmi ham xususiy investitsiyalarni jalb etishga xizmat qildi.

Eng ko‘p mablag‘ moliya, transport va davlat boshqaruvi sohalariga yo‘naltirildi. Bu tarmoqlar iqtisodiy barqarorlik uchun muhim hisoblanadi.

Bank 2025-yilda bir qator yirik islohotlarni ham boshladi. Ular orasida kredit berish imkoniyatlarini kengaytirish va moliyalashtirish hajmini 50 foizga oshirish bor.

Shuningdek, energetika siyosati yangilandi va xarid tartiblari soddalashtirildi. Qayta tiklanadigan energiya va raqamli texnologiyalar uchun yangi yondashuv joriy etildi.

Eslatib o‘tamiz, avvalroq Ipak Yuli bank YTTBʼning tasdiqlovchi bank maqomini olgandi. Ta’kidlanishicha, mazkur maqom bankka xalqaro bitimlar boʻyicha toʻlovlarni kafolatlash imkoniyatini taqdim etadi. Bu esa xorijiy hamkorlar bilan ishlashda biznes uchun qoʻshimcha himoya vositasi boʻlib xizmat qiladi.