General Motors (GM) kompaniyasi yangi Chevrolet Sonic 2027 modelining salon dizaynini rasman taqdim etdi. Bu haqda GMAutority nashri xabar bermoqda.
Kompaniya ma’lumotiga ko‘ra, yangi model interyeri sport uslub va zamonaviy texnologiyalar uyg‘unligida yaratilgan. Salon besh kishiga mo‘ljallangan bo‘lib, bagaj hajmi taxminan 400 litrni tashkil etadi.
Panel dizaynida gorizontal chiziqlar qo‘llanilgan. Bu element salonni vizual jihatdan kengroq ko‘rsatadi va yuqori texnologik muhit yaratadi. Yangi Chevrolet Sonic platforma jihatdan Chevrolet Onix modeli bilan yaqin. Shu sababli ularning boshqaruv paneli, virtual kokpit va ayrim funksiyalari o‘xshash.
Top versiyada salon to‘liq qora rangda ishlangan. Yumshoq materiallar, maxsus tikuvli dekor elementlar va yangilangan Chevrolet logotipi qo‘llangan. Shuningdek, ambient yoritish tizimi va qulay o‘rindiqlar ham mavjud. Model Braziliyada yaqin kunlarda sotuvga chiqadi. Chevrolet Sonic kompaniyaning arzon segmentdagi krossoverlar bozoriga kirishidagi muhim qadam sifatida baholanmoqda.
Eslatib o‘tamiz, Kursiv Uzbekistan nashri yangi Chevrolet Sonic krossoveri qachon sotuvga chiqishi haqida yozgan edi.
