Huawei va JAC hamkorligidagi Maextro brendi S800 Grand Design sedanining ilk rasmiy suratlarini e’lon qildi. Model S800 flagman sedanining yuqori darajadagi maxsus versiyasi hisoblanadi.
Yangi avtomobil iyun oyida ommaga namoyish etilishi rejalashtirilgan. Rasmiy suratlarda ko‘rsatilgan davlat raqamiga qaraganda, model Xitoy bozorida Maextro S800 Collector’s Edition nomi bilan sotilishi mumkin. Maextro S800 Grand Design ikki rangli kuzovga ega. Uning yuqori qismi Far Mountain Cyan rangida, pastki qismi esa oq rangda ishlangan.
Avtomobilning hashamatli ko‘rinishini kuchaytirish uchun oltin rangli dekor elementlari qo‘llangan. Kapot ustidagi logotip, kapot markazidan o‘tuvchi vertikal chiziq, qanotlar, C ustunlari, g‘ildiraklar va orqa eshikdagi logotiplar oltin rangda bajarilgan.
Model to‘liq o‘lchamli lyuks sedan sifatida joylashtirilmoqda. Uning uzunligi 5480 mm, eni 2000 mm, balandligi esa konfiguratsiyaga qarab 1536 yoki 1542 mmni tashkil qiladi. G‘ildirak bazasi 3370 mmga teng. Salon to‘rt o‘rindiqli tartibda ishlab chiqilgan.
Texnologik jihatdan S800 Grand Design tom qismiga o‘rnatilgan 896 chiziqli LiDAR tizimi bilan jihozlangan. B ustunlariga joylashtirilgan qo‘shimcha kameralar esa avtomobilda Huawei’ning yangi Qiankun ADS 5.0 haydovchiga yordam tizimi bo‘lishi mumkinligini ko‘rsatmoqda.
Elektromotorlar mos ravishda 160 kW, 237,5 kW va 237,5 kW quvvat ishlab chiqaradi. Ushbu versiya WLTC sikli bo‘yicha faqat elektr rejimida 276 km masofa bosib o‘ta oladi. Ikkinchi variant to‘liq elektr BEV versiya bo‘ladi. U Huawei’ning ikki motorli tizimi bilan jihozlanadi. Motorlar 160 kW va 230 kW quvvat beradi.
Maextro S800 Grand Design narxi $200 mingdan $300 minggacha bo‘lishi mumkinligi aytilmoqda. Bu uni Xitoydagi eng qimmat mahalliy lyuks sedanlardan biriga aylantiradi.
Eslatib o‘tamiz, «Kursiv» Huawei va SAIC yangi Saic Z7T avtomobilini namoyish etgani haqida yozgan edi.
