RedMagic kompaniyasi yangi RedMagic 11S Pro gaming smartfonining global taqdimot sanasini e’lon qildi. Qurilmaning xalqaro versiyasi 27-may kuni namoyish etiladi.
Kompaniyaning rasmiy sahifasida RedMagic 11S Pro taqdimoti 27-may kuni AQSh vaqti bilan 08:00 da o‘tkazilishi ko‘rsatilgan. Smartfon 7500 mA/soat sig‘imli batareya va yangilangan AquaCore sovitish tizimi bilan chiqadi.
Dastlabki buyurtmalar iyun boshida ochilishi kutilmoqda. To‘liq savdolar esa taxminan 9-iyundan boshlanishi mumkin. Global versiya narxi hozircha e’lon qilinmagan. Xitoyda RedMagic 11S Pro narxi $810 dan boshlanadi. Yangi model RedMagic’ning eng kuchli gaming smartfonlaridan biri bo‘ladi. U Snapdragon 8 Elite Gen 5 Leading Version chipi bilan jihozlanadi. Bu protsessor odatiy versiyaga nisbatan yuqori chastotada ishlashi bilan ajralib turadi.
Smartfonda faol sovitish tizimi ham saqlanadi. Qurilmaga daqiqasiga 24 ming aylanish tezligiga ega ventilyator o‘rnatiladi. Bu uzoq o‘yin sessiyalarida chip haroratini nazorat qilishga yordam beradi.
RedMagic 11S Pro AMOLED ekran bilan taqdim etiladi. Displey 144 Hz yangilanish chastotasini qo‘llab-quvvatlaydi. Bu o‘yinlarda tasvirning silliq ko‘rinishini ta’minlaydi. Qurilmaning yana bir muhim jihati ekranda kesim yoki teshik yo‘qligidir. Bu foydalanuvchiga to‘liq ekranli tajriba beradi va gaming smartfonlar uchun muhim afzallik sanaladi.
Global versiyada 7500 mA/soat sig‘imli akkumulyator bo‘ladi. U 80 W tezkor quvvatlashni qo‘llab-quvvatlaydi. Bu Xitoydagi ayrim versiyalardan farq qilishi mumkin. RedMagic 11S Pro IPX8 darajasidagi suvdan himoya bilan ham ajralib turadi. Rasmiy RedMagic sahifasida ushbu seriya IPX8 suvga chidamlilik va changdan himoyalangan maxsus dizayn bilan ko‘rsatilgan.
Eslatib o‘tamiz, Kursiv Uzbekistan nashri RedMagic 11S Pro va 11S Pro+ taqdim etilgani haqida yozgan edi.
