Tesla yangi avlod Tesla Roadster elektromobilini Giga Texas zavodida ishlab chiqaradi. Bu haqda Tesla investori Soyyer Merritt kompaniya rahbarlari ishtirokidagi podkastga tayanib xabar berdi.
Uning so‘zlariga ko‘ra, ma’lumotni Tesla’ning avtomobil ishlab chiqish bo‘yicha vitse-prezidenti Lars Moravi va bosh dizayner Frans fon Xolshauzen tasdiqlagan. Yangi Roadster ishlab chiqarilishi aynan Texasdagi zavodda yo‘lga qo‘yiladi. Model S va Model X ishlab chiqarish yakunlanganidan so‘ng, Giga Texas to‘rtta asosiy modelni yig‘adi.
Ular qatoriga Model Y, Cybertruck, Cybercab va yangi Tesla Roadster kiradi. Tesla rahbarlari Roadster bo‘yicha ishga tushirish rejalari tayyor ekanini bildirgan. Bu qaror Giga Texas zavodining Tesla uchun ahamiyatini yanada oshiradi. Korxona yuqori unumdorlikka ega va avtonom elektromobillar ishlab chiqarish markaziga aylanmoqda.
Yangi Tesla Roadster uzoq kutilayotgan elektr superkar hisoblanadi. U kompaniyaning eng tezkor va texnologik jihatdan ilg‘or modellaridan biri bo‘lishi kutilmoqda. Norasmiy ma’lumotlarga ko‘ra, avtomobil uch motorli kuch qurilmasi bilan jihozlanadi. Shuningdek, unga 200 kVt/soat sig‘imli batareya o‘rnatilishi mumkin.
Modelning 0 dan 100 km/soat tezlikka chiqishi taxminan bir soniya atrofida bo‘lishi mumkin. Agar bu ko‘rsatkich tasdiqlansa, yangi Roadster bozordagi eng tezkor seriyali elektromobillardan biriga aylanadi.
«Kursiv» Xiaomi YU7 elektromobilining arzonroq versiyasi taqdim etilgani haqida yozgan edi.
