General Motors Braziliya bozorida 2027-yilgi Chevrolet Onix Eco modelini taqdim etishga tayyorlanmoqda. GMAutority nashrining yozishicha, yangi avtomobil faqat etanolda harakatlanadi.
Chevrolet’ning Braziliyadagi bo‘linmasi dilerlarga yangi Onix Eco haqida ma’lumot bergan. Model 2027-yilgi Onix oilasining boshlang‘ich versiyasi sifatida sotuvga chiqariladi. Avvalgi ma’lumotlarda Onix Eco faqat xetchbek bo‘lishi aytilgan edi. Biroq yangi xabarlarga ko‘ra, avtomobil xetchbek va sedan kuzovlarida taklif etiladi.
Chevrolet Onix Eco 1,0 litrli uch silindrli turbo dvigatel bilan jihozlanadi. Dvigatel bevosita yonilg‘i purkash tizimisiz ishlaydi va faqat etanolga moslashtirilgan. U 115 ot kuchi va 122 funt-fut aylanish momenti hosil qiladi. Avtomobilga olti pog‘onali avtomatik uzatmalar qutisi o‘rnatiladi. Shu sababli model Braziliya bozoridagi eng yaxshi jihozlangan boshlang‘ich avtomobillardan biri bo‘lishi kutilmoqda.
Kutishga arziydimi
Chevrolet Onix Eco boshlang‘ich AT Turbo komplektatsiyasi asosida ishlab chiqiladi. Uning jihozlari ham ushbu versiyaga yaqin bo‘ladi. Model olti dona xavfsizlik yostiqchasi, konditsioner, elektr kuchaytirgichli rul va avtomatik faralar bilan ta’minlanadi. Shuningdek, unda kalitsiz kirish tizimi, 8 dyuymli sensorli ekran, simsiz Apple CarPlay va Android Auto bo‘ladi.
Bundan tashqari, avtomobil kunduzgi galogen chiroqlar va 15 dyuymli po‘lat disklar bilan jihozlanadi. Chevrolet Onix Eco tejamkor va nisbatan arzon kirish modeli sifatida taklif qilinadi.
Braziliya hukumati avtomobil sanoatida yonilg‘i sarfi va chiqindilarni kamaytirishga qaratilgan yangi soliq imtiyozlari dasturini ilgari surmoqda. Dasturda etanol kabi bioyonilg‘idan foydalanadigan avtomobillarga alohida e’tibor qaratilgan.
Eslatib o‘tamiz, Kursiv Uzbekistan 2026-yilda sotib olish tavsiya etilmaydigan avtomobillar haqida yozgan edi.
