AQSh futbol federatsiyasi mamlakat mezbonlik qiladigan jahon chempionatida ishtirok etuvchi 26 nafar futbolchidan iborat ro‘yxatni rasman taqdim etdi.
Terma jamoa bosh murabbiyi Maurisio Pochettino Nyu-Yorkdagi maxsus tadbirda 11-iyundan 19-iyulga qadar AQSh, Kanada va Meksika maydonlarida bo‘lib o‘tadigan turnir uchun o‘z tanlovini e’lon qildi.
Jamoaning yarmi — 13 nafar futbolchi 2022-yilgi Qatardagi jahon chempionatida ham ishtirok etgan tajribali o‘yinchilardir. Ular orasida Kristian Pulishich, Tim Vea va Xaji Rayt kabi yetakchilar bor.
Qizig‘i shundaki, 1996-yildan buyon ilk bor barcha uchala darvozabon ham (Kris Bredi, Mett Friz, Mett Terner) mahalliy MLS ligasi vakillari hisoblanadi.
AQSh terma jamoasining to‘liq tarkibi:
- Darvozabonlar: Kris Bredi («Chikago Fayr»), Mett Friz («Nyu-York Siti»), Mett Terner («Nyu-Inglend Revolyushn»).
- Himoyachilar: Maks Arfsten, Serjino Dest, Aleks Friman, Mark Makkenzi, Tim Rim, Kris Richards, Entoni Robinson, Maylz Robinson, Jo Skalli, Aston Trasti.
- Yarim himoyachilar: Tayler Adams, Sebastyan Berxalter, Ueston Makkenni, Jovani Reyna, Kristian Roldan, Malik Tillmann.
- Hujumchilar: Brenden Aaronson, Folarin Balogun, Rikardo Pepi, Kristian Pulishich, Tim Vea, Xaji Rayt, Alexandro Zendejas.
Tayyorgarlik va ilk raqiblar
Hozirda jamoa Atlantaga yakuniy yig‘inga yo‘l olgan. JCh startiga qadar amerikaliklar ikkita o‘rtoqlik uchrashuvi o‘tkazadi: 31-may kuni Senegalga qarshi va 6-iyun kuni Germaniya bilan.
AQSh terma jamoasi mundialdagi yurishini «D» guruhida boshlaydi:
- 13-iyun (shanba tongi): Paragvay — AQSh
- Mahalliy vaqt: 12-iyun, 21:00 (ET) / 18:00 (PT)
- Toshkent vaqti: 13-iyun, tonggi 06:00
- 20-iyun (shanba tuni): Avstraliya — AQSh
- Mahalliy vaqt: 19-iyun, 15:00 (ET) / 12:00 (PT)
- Toshkent vaqti: 20-iyun, tungi 00:00 (yarim tunda)
- 26-iyun (juma tongi): Turkiya — AQSh
- Mahalliy vaqt: 25-iyun, 22:00 (ET) / 19:00 (PT)
- Toshkent vaqti: 26-iyun, tonggi 07:00
«Biz ushbu 26 nafar futbolchi jahon chempionatida muvaffaqiyatga erishishimizga yordam beradigan eng kuchli guruh ekanligiga ishonamiz», — deya ta’kidladi Pochettino.
Ma’lumot uchun, ushbu ro‘yxat 1-iyunga qadar FIFAga rasman taqdim etilishi lozim. Shundan so‘ng, jarohat holatida futbolchilarni turnir startiga 24 soat qolguncha almashtirish imkoniyati saqlanib qoladi.
Avvalroq Kursiv Uzbekistan Jahon chempionatida O‘zbekistonning guruhdagi raqibi — Kongo Demokratik Respublikasida Ebola virusi tarqalgani va bu jamoaning AQShga kirishi uchun 21 kunlik qat’iy karantindan o‘tish talabi qo‘yilgani haqida yozgan edi.
