30-iyun kuni Versal Qirollik operasi sahnasida buyuk kompozitor Georg Fridrix Gendel qalamiga mansub «Tamerlano» operasining konsert talqini bo‘lib o‘tadi.
O‘zbekiston Madaniyat va san’atni rivojlantirish jamg‘armasi xabariga ko‘ra, ushbu loyiha Fransiyada ilk bor mustaqil dastur sifatida taqdim etilmoqda. Bungacha mazkur opera Venadagi mashhur «Musikverein» zalida tomoshabinlar olqishiga sazovor bo‘lgan edi.
Ijrochilar va o‘ziga xos yondashuv
Konsert dasturida Jenisbek Piyazov, Xuan Sancho va Veronika Kanhemi kabi xalqaro yulduzlar bilan birga O‘zbekiston Milliy simfonik orkestri hamda O‘zbekistonda xizmat ko‘rsatgan xor jamoasi ishtirok etadi. Loyiha uchun musiqiy konsepsiyani bastakor Kirill Rixter tayyorlagan bo‘lib, u barokko davriga mansub murakkab partiturani qayta ko‘rib chiqib, asarning tarixiy ruhini saqlagan holda unga zamonaviy jilo bergan.
Tarixiylik va zamonaviylik
Gendelning «Tamerlano» operasi Amir Temur siymosiga bag‘ishlangan jahon merosidagi eng muhim asarlardan biri sanaladi.
Avvalroq Kursiv Uzbekistan Alisher Navoiy nomidagi Davlat akademik Katta teatri sahnasida «Tamerlano» operasining 2024-yilda bo‘lib o‘tgan ilk premyerasi haqida xabar bergan edi.
