Xitoy bilan Toshkentni rivojlantirishga oid 3,5 mlrd dollarlik kelishuvlar imzolandi

Sian shahrida bo‘lib o‘tgan III O‘zbekiston–Xitoy hududlararo forumi Toshkent shahri uchun yirik moliyaviy kelishuvlar bilan yakunlandi. Poytaxt hokimligi xitoylik hamkorlar bilan umumiy qiymati 3,5 mlrd dollardan ortiq bo‘lgan investitsiya va eksport shartnomalarini imzoladi.

Kelishuvlarning asosiy qismi — 3,35 mlrd dollari bevosita investitsiyalarga, 156 mln dollari esa eksport shartnomalariga to‘g‘ri keladi.

Strategik loyihalar: Transportdan drenajgacha

Investitsiyalarning eng katta ulushi shahar transporti va yo‘l tizimini yaxshilashga sarflanadi. Xususan, 1 mlrd dollar mablag‘ BRT (tezkor avtobus yo‘laklari), yangi yo‘l o‘tkazgichlar va yo‘l infratuzilmasini rivojlantirishga yo‘naltiriladi. Yana 1 mlrd dollar transport va ijtimoiy sohadagi qo‘shma loyihalarga ajratilishi belgilangan.

Asosiy yo‘nalishlar va kutilayotgan investitsiya hajmi:

Moliyalashtirishning yangi modeli: EPC+F

Ushbu loyihalarning o‘ziga xosligi shundaki, ular davlat byudjeti va davlat kafolatlarisiz amalga oshiriladi. Moliyalashtirish xitoylik hamkorlar tomonidan EPC+F (Engineering, Procurement, Construction + Financing) modeli asosida jalb qilinadi.

Ushbu modelga ko‘ra, pudratchi loyihani loyihalashtirish, jihozlash va qurish bilan birga uning moliyaviy manbasini ham ta’minlaydi. To‘lovlar esa uzoq muddatli istiqbolda, shahar byudjetining yangi daromad manbalari hisobidan bosqichma-bosqich qaytariladi.

Sanoat va Eksport: «Yangi Avlod» zonasi

Forum doirasida «Yangi Avlod» maxsus sanoat zonasini rivojlantirish bo‘yicha 130 mln dollarlik kelishuvlar imzolandi. Xitoyning Jwise, Zhongke Honghu va CAS Cloud kabi texnologik gigantlari Toshkentdagi ishlab chiqarish jarayonlariga yuqori texnologiyalarni olib kiradi.

Eksport yo‘nalishida ham sezilarli natijalar qayd etildi. Xususan, 150 mln dollarlik zargarlik buyumlari, shuningdek, ip-kalava va kumush konsentratini yetkazib berish bo‘yicha shartnomalar imzolangan.

Eslatib o‘tamiz, avvalroq Kursiv O‘zbekiston joriy yilning birinchi choragida 13,7 mlrd dollar miqdorida investitsiyalarni o‘zlashtirgani haqida xabar bergan edi. Toshkentning yangi megat loyihalari mamlakatning umumiy investitsion dinamikasini yanada mustahkamlashi kutilmoqda.