Qon bosimini muntazam tekshirmaslik insult xavfini oshirishi mumkin. Bu haqda shifokor Aleksandr Umnov ma’lum qildi.
Shifokorga ko‘ra, ko‘pchilik qon bosimini o‘lchamaydi yoki ko‘tarilgan bosimni bitta dori bilan tushirib, muammoga jiddiy e’tibor bermaydi. Bunday yondashuv xavfli oqibatlarga olib kelishi mumkin.
Umnovning aytishicha, agar qon bosimi muntazam ravishda yuqori bo‘lsa, shifokorga murojaat qilish kerak. Mutaxassis bemorga ertalab va kechqurun qabul qilinadigan dorilar tizimini belgilab beradi.
Shirinlikni ko‘p iste’mol qilish tomirlarga zarar yetkazadi
Shifokor shirin mahsulotlarni haddan tashqari ko‘p iste’mol qilish ham xavfli ekanini aytdi. Uning so‘zlariga ko‘ra, shakar miqdori yuqori bo‘lgan mahsulotlar qon tomirlariga ichki tomondan zarar yetkazishi mumkin.
Umnov shirin taomlar va turli shirinliklarni me’yorida iste’mol qilish kerakligini ta’kidladi. Ayniqsa, kamharakat turmush tarzi bu xavfni yanada kuchaytiradi.
Kamharakatlik qon aylanishini sekinlashtiradi. Bu esa moddalar almashinuvining buzilishiga olib keladi. Natijada diabet, semizlik va yuqori qon bosimi xavfi ortadi.
Noto‘g‘ri ovqatlanish ham insult xavfini oshiradi
Mutaxassis yana bir xavfli odat sifatida ovqatlanishga e’tiborsizlikni ko‘rsatdi. Uning aytishicha, ayrim odamlar kundalik ratsion tarkibi haqida o‘ylamaydi. Ular ovqatda foydali moddalarning yetarli yoki yetarli emasligini baholamaydi.
Bunday insonlar ko‘pincha kotlet, pyure, omlet, bulochka va shirin ichimliklarni iste’mol qiladi. Ammo foydali yormalar, yangi sabzavotlar va ko‘katlarni yetarlicha yemaydi.
Shifokorga ko‘ra, bunday ovqatlanish muvozanatsiz hisoblanadi. U uzoq muddat davom etsa, yurak-qon tomir tizimiga salbiy ta’sir ko‘rsatishi mumkin.
Muvozanatli ratsion va harakat muhim
Umnov insult xavfini kamaytirish uchun qon bosimini nazorat qilish, shirinlikni me’yorida iste’mol qilish va ratsionni muvozanatlash muhimligini aytdi.
Shuningdek, kundalik hayotda ko‘proq harakat qilish ham zarur. Faol turmush tarzi qon aylanishini yaxshilaydi va ortiqcha vazn xavfini kamaytiradi.
Mutaxassisning fikricha, inson o‘z salomatligiga muntazam e’tibor berishi kerak. Ayniqsa, yuqori qon bosimi, semizlik yoki qandli diabet xavfi bo‘lgan odamlarda bu masala yanada muhimdir.
Avvalroq Kursiv Uzbekistan pensiya yoshidagilar uchun foydali mashg‘ulotlar haqida yozgan edi.
