General Motors (GM) kompaniyasi Chevrolet Bolt 2027 elektromobili egalari uchun quvvatlash bo‘yicha tavsiyalarni e’lon qildi. Bu haqda GMAutority nashri xabar berdi.
Yangi avlod Chevrolet Bolt yangilangan dizayn, qayta ishlangan salon va yangi kuch qurilmasi bilan taqdim etilgan. Elektromobilda akkumulyator holatini to‘g‘ri saqlash muhim hisoblanadi. Shu sababli GM foydalanuvchilarga batareya ishlashini yaxshilash va yurish zaxirasini aniq hisoblash bo‘yicha ko‘rsatmalar berdi.
Aksariyat elektromobillarda kundalik foydalanish uchun 80 foizgacha quvvatlash tavsiya etiladi. Biroq GM 2027 Chevrolet Bolt egalari uchun yuqori quvvat chegarasini 100 foizda qoldirishni maslahat bermoqda. Kompaniya haftasiga kamida bir marta akkumulyatorni 100 foizgacha to‘liq quvvatlashni tavsiya qiladi. Bu batareya darajasi va yurish zaxirasi haqidagi hisob-kitoblarni aniqroq saqlashga yordam beradi.
GM imkon qadar quvvat darajasini 20 foizdan past tushirmaslikni ham maslahat berdi. Batareyada zaxira energiya saqlanishi akkumulyator boshqaruvi uchun foydali bo‘ladi. Bu past quvvat haqidagi ogohlantirishlar ehtimolini ham kamaytiradi.
Alohida tavsiyalar
Tog‘li hududlarda muntazam harakatlanadigan haydovchilar uchun alohida tavsiya berildi. Bunday yo‘llarga chiqishdan oldin batareyani 80 foiz yoki undan past darajada qoldirish maqsadga muvofiq. Bu uzoq pastga tushishlarda regenerativ tormozlash tizimiga ko‘proq energiya qaytarish imkonini beradi. Natijada elektromobil samaradorligi oshadi.
Tashqi harorat ham elektromobil ishlashiga ta’sir qiladi. GM havo harorati 0 darajadan past yoki 32 darajadan yuqori bo‘lganda avtomobilni quvvatga ulangan holda saqlashni tavsiya etadi. Bu batareyani oldindan tayyorlash va uning uzoq muddatli holatini saqlashga yordam beradi. Ayniqsa, avtomobil uzoq vaqt harakatsiz turadigan bo‘lsa, bu tavsiya muhim hisoblanadi.
Muhim ogohlantirishlar
Kompaniya shikastlangan quvvatlash uskunalaridan foydalanmaslikni ham ogohlantirdi. Yoriqlari bor, simlari ochilib qolgan, kontakt pinlari yetishmaydigan yoki boshqa nuqsonli quvvatlagichlar xavfli bo‘lishi mumkin. Bunday uskuna avtomobilga zarar yetkazishi ehtimoli bor.
2027 Chevrolet Bolt standart holatda NACS quvvatlash porti bilan jihozlangan. Ayrim quvvatlash stansiyalariga ulanish uchun adapter kerak bo‘lishi mumkin. Elektromobil AC va DC tezkor quvvatlashni qo‘llab-quvvatlaydi. GM’ga ko‘ra, AC quvvatlash odatda tunda yoki kundalik rejimda quvvatlash uchun qulay.
DC tezkor quvvatlash esa uzoq safarlarda qisqa to‘xtashlar paytida foydalanish uchun mo‘ljallangan. Fast Charge Prep funksiyasiga ega avtomobillarda navigatsiyaga quvvatlash stansiyasi kiritilsa, batareya avtomatik tayyorlanadi. Bu DC quvvatlash samaradorligini oshiradi.
2027 Chevrolet Bolt GM BEV2 platformasining yangilangan versiyasida ishlab chiqilgan. Model AQShning Kanzas-Siti shahridagi GM Fairfax zavodida ishlab chiqariladi.
Avvalroq Kursiv Uzbekistan nashri Chevrolet Onix 2027 avtomobili rasman taqdim etilgani haqida yozgan edi.
