Qirg‘iziston prezidenti sobiq maslahatchisi uy qamog‘iga o‘tkazildi

Bishkek shahrining Lenin tuman sudi Qirg‘iziston prezidenti sobiq maslahatchisi Janibek Kubandikovga nisbatan ehtiyot chorasini o‘zgartirdi. U firibgarlikda ayblanmoqda. Kaktus.media xabariga ko‘ra, sud uni qamoqda saqlash o‘rniga uy qamog‘iga o‘tkazgan.

Sud ma’lumotlariga ko‘ra, tegishli qaror 2026-yil 6-iyun kuni tergov sudyasi tomonidan chiqarilgan. Ehtiyot chorasi tergov muddati uchun, ya’ni 17-iyulgacha belgilangan.

Avvalroq, 22-may kuni Bishkekning Lenin tuman sudi tergov iltimosnomasini qanoatlantirgan edi. Shundan so‘ng Kubandikov 17-iyulgacha qamoqqa olingan. Janibek Kubandikov 21-may kuni qo‘lga olingan. U xorijiy investorlar bilan bog‘liq o‘ta yirik miqdordagi firibgarlikda gumon qilingan.

Ish Qirg‘iziston Jinoyat kodeksining 209-moddasi, ya’ni «Firibgarlik» moddasi bilan tergov qilinmoqda. Tergov organlari holatning barcha tafsilotlari va ehtimoliy sheriklarni aniqlamoqda.

Qirg‘iziston OAVlari Kubandikovni prezident Sadir Japarovning sobiq maslahatchisi sifatida tilga olgan. Temirov Live surishtiruv loyihasi jurnalistlari esa u Jogorku Kenesh deputati Medina Kayrilbekovaning turmush o‘rtog‘i sifatida ham ko‘rsatilganini yozgan.

Qirg‘iziston prezidenti administratsiyasi jamoatchilik asosidagi maslahatchilar va yordamchilar maqomiga ham izoh berdi. Prezident matbuot kotibi Askat Alagozovning aytishicha, hozir mamlakat fuqarolari orasida bunday lavozimlar mavjud emas.

Eslatib o‘tamiz, Kursiv Uzbekistan nashri Qirg‘izistonda prezidentning sobiq maslahatchisi Janibek Kubandikov qo‘lga olingani haqida yozgan edi.