Xitoyning Navee kompaniyasi suv yuzasidan juda past balandlikda harakatlanib, ekran effektidan foydalanadigan yangi turdagi WaveFly 5X transport vositasini namoyish etdi.
Apparat Xunan provinsiyasidagi Duntayxu ko‘lida o‘tkazilgan namoyish davomida jurnalistlar va sanoat vakillari oldida sinovdan o‘tkazildi. Kompaniya ushbu qurilmani elektr skuterlar va shaxsiy mobil transport yechimlari yo‘nalishidagi tajribasining yangi bosqichi sifatida taqdim etdi.
WaveFly 5X ekran effektidan foydalanadi: harakatlanish vaqtida qanotlar suv yuzasi bilan apparat orasida qo‘shimcha ko‘tarilish kuchi hosil qilib, uni to‘lqinlar ustida juda past balandlikda «sirpanib» harakatlanishiga imkon beradi. Bu texnologiya qarshilikni kamaytirib, yuqori tezlikda samaradorlikni oshiradi.
Apparat tandem qanotli tuzilma va aviatsion uglerod tolali (ugleplastik) korpus bilan jihozlangan. Yengil konstruksiya suv ustida barqarorlikni saqlashga yordam beradi va umumiy og‘irlikni kamaytiradi. Uning maksimal tezligi soatiga 85 km ga (53 mil/soat) yetadi, yuk ko‘tarish quvvati 140 kg gacha, bir zaryadda yurish masofasi esa taxminan 80 km ni tashkil etadi.
Kompaniya ushbu loyihani suv usti past balandlik mobiliteti yangi segmentining bir qismi sifatida ko‘rmoqda. WaveFly 5X dengiz, aviatsiya va elektr transport texnologiyalarini bir platformada birlashtirgan yangi avlod shaxsiy transport vositasi sifatida taqdim etilgan.
Eslatib o‘tamiz, avvalroq Nissan Primera uzoq tanaffusdan so‘ng elektromobil sifatida qaytishi haqida yozgan edik.
