Germaniyadagi Jahon chempionati, iPhone 3G taqdimoti va gollivud yulduzlari — kun tarixi
9-iyun sanasi texnologiya olamidagi inqilobiy yangiliklar, shuningdek, jahon kinosi va futboli afsonalarining tavalludi bilan yodda qolgan. Kursiv Uzbekistan kunning eng muhim voqealari xronologik tartibda taqdim etadi.
1934-yilda Donald Dak birinchi marta ekranga chiqdi. Hammaga bolalikdan yod bo‘lib ketgan sevimli o‘rdakcha personaji ilk bor Walt Disney kompaniyasining «The Wise Little Hen» («Aqlli kichik tovuq») qisqa metrajli multfilmida ko‘rinish bergan. O‘zining dengizchi kiyimi va o‘ziga xos ovozi bilan ajralib turadigan bu qahramon tez orada butun dunyo bo‘ylab millionlab bolalarning eng sevimli obrazlaridan biriga aylandi.
1963-yili amerikalik taniqli aktyor Jonni Depp dunyoga keldi. U «Karib dengizi qaroqchilari» filmidagi Kapitan Jek Chittak obrazi orqali o‘zbekistonlik kinomuxlislar qalbidan ham chuqur joy olgan. Gollivud super yulduzi o‘z faoliyati davomida uch marta «Oskar» mukofotiga nomzod bo‘lgan va kino san’atiga qo‘shgan hissasi uchun ko‘plab nufuzli e’tiroflarga sazovor bo‘lgan.
1978-yilda germaniyalik afsonaviy futbolchi Miroslav Kloze tavallud topdi. U FIFA Jahon chempionatlari tarixidagi mutlaq eng yaxshi to‘purar sifatida e’tirof etiladi va uning hisobida ushbu turnirlarda kiritilgan 16 ta gol mavjud. Kloze Germaniya terma jamoasi safida 2014-yilda jahon chempionligi tojini kiygan hamda xalqaro maydondagi barqaror va halol o‘yini bilan muxlislar xotirasiga muhrlangan.
1981-yili kino olamining yana bir yorqin yulduzi Natali Portman tug‘ilgan. U ilk marta «Leon» filmidagi qoyilmaqom ijrosi orqali tanilgan hamda yillar o‘tib jahon darajasidagi aktrisa darajasiga ko‘tarilgan. Portman «Qora oqqush» kartinasidagi psixologik murakkab roli uchun 2011-yilda eng yaxshi aktrisa yo‘nalishida «Oskar» mukofotini qo‘lga kiritgan.
2006-yilda Germaniyada FIFA Jahon chempionati start oldi. O‘zbekistonda millionlar o‘yini muxlislari orziqib kutgan ushbu mundial aynan shu kuni mezbon Germaniya hamda Kosta-Rika terma jamoalari o‘rtasidagi sermahsul uchrashuv (4:2) bilan boshlangan edi. Qiziqarlisi, ushbu ochilish o‘yinida o‘zining tug‘ilgan kunini nishonlayotgan Miroslav Kloze raqib darvozasiga ikkita gol kiritishga muvaffaq bo‘lgan.
2008-yili iPhone 3G smartfoni taqdim etildi. Stiv Jobs aynan shu kuni Apple kompaniyasining ikkinchi avlod smartfonini ommaga namoyish qildi. Bu qurilma avvalgisidan ikki baravar tezroq ishlaydigan 3G internet hamda App Store tarmog‘i orqali uchinchi tomon dasturlarini yuklab olish imkoniyati bilan zamonaviy smartfonlar erasi tezkor rivojlanishiga ulkan turtki berdi.
Avvalroq Kursiv Uzbekistan 6-iyun sanasida sodir bo‘lgan muhim hodisalar haqida xabar bergan edi.
