O‘zbekiston milliy terma jamoasi bosh murabbiyi Fabio Kannavaro Niderlandiyaga qarshi o‘rtoqlik uchrashuvidan so‘ng o‘z fikrlarini bildirdi. Bu haqda O‘FA xabar bermoqda.
O‘zbekiston Nyu-Yorkda o‘tgan bahsda Niderlandiyaga 1:2 hisobida imkoniyatni boy berdi. Milliy jamoa 90+2-daqiqada Igor Sergeyevning goli evaziga hisobni tenglashtirdi, ammo qo‘shib berilgan daqiqalarda ikkinchi golni o‘tkazib yubordi.
Kannavaroning aytishicha, jamoa kuchli raqibga qarshi ko‘plab ijobiy jihatlarni ko‘rsata oldi. U hisob 1:0 bo‘lganidan keyin ham futbolchilar maydondagi tartibni yo‘qotmaganini ta’kidladi.
«Menimcha, biz ko‘plab ijobiy jihatlarni ko‘rsata oldik. Hisob 1:0 bo‘lganidan keyin ham maydondagi tartib va liniyani yo‘qotmadik. Jamoa bo‘lib harakat qilishda davom etdik va oxirigacha kurashdik», – qayd etgan Fabio Kannavaro.
Mutaxassis bunday darajadagi terma jamoalarga qarshi o‘ynash oson emasligini qayd etdi. Uning fikricha, O‘zbekiston uchun aynan shunday o‘yinlar kerak. Chunki kuchli raqiblarga qarshi bahslar futbolchilarga tajriba beradi.
«Bunday darajadagi milliy jamoalarga qarshi o‘ynash oson emas. Biroq jamoam o‘yinida ko‘plab ijobiy jihatlarni ko‘rdim. Bizga aynan shunday o‘yinlar kerak. Umuman olganda, uchrashuvdan mamnunman», – degan Fabio Kannavaro.
Bosh murabbiy himoyadagi xatolar haqida ham gapirdi. U futbolda xatolarsiz o‘ynab bo‘lmasligini aytdi. Kannavaro murabbiylar shtabining vazifasi bunday xatolarni kamaytirishga yordam berish ekanini ta’kidladi.
«Futbolni xatolarsiz o‘ynab bo‘lmaydi. Bu mutlaqo normal holat. Bizning vazifamiz futbolchilarga shunday xatolar sonini imkon qadar kamaytirishda yordam berishdir», – dedi Fabio Kannavaro.
Shu bilan birga, italiyalik mutaxassis himoyadagi kamchiliklardan ko‘ra ijobiy jihatlar ko‘proq bo‘lganini bildirdi. Uning aytishicha, jamoa kuchli bosim ostida ham o‘z tartibini saqlab qolishga harakat qilgan.
Kannavaro futbolchilarning jismoniy holatiga ham to‘xtaldi. U tayyorgarlik jarayoni bir oydan ko‘proq vaqt oldin boshlanganini, legionerlar esa jamoaga keyinroq qo‘shilganini aytdi.
Shunga qaramay, bosh murabbiy jismoniy tayyorgarlik bo‘yicha yaxshi ish qilinganiga ishonishini bildirdi. U ayrim futbolchilar bilan bog‘liq hali hal qilinishi kerak bo‘lgan masalalar borligini ham qo‘shimcha qildi.
«Tayyorgarlikni bir oydan ham ko‘proq vaqt oldin boshlaganmiz, legioner futbolchilarimiz esa keyinroq jamoaga qo‘shildi. Shunga qaramay, jismoniy tayyorgarlik borasida yaxshi ish olib borganimizga ishonaman», – deya qayd etgan Fabio Kannavaro.
Eslatib o‘tamiz, Niderlandiya O‘zbekistonga qarshi bahsda ikkala golni ham penaltidan urdi. Kodi Gakpo dubl qayd etdi. O‘zbekiston safida yagona gol muallifi Igor Sergeyev bo‘ldi.
