Si Szinpin va Putin Eron mojarosida AQShga to‘sqinlik qilmadi — Tramp
AQSh prezidenti Donald Tramp Eron bilan bog‘liq mojaro yakunida Xitoy raisi Si Szinpin va Rossiya prezidenti Vladimir Putinning pozitsiyasini neytral deb baholab, ular vaziyatni keskinlashtirish o‘rniga mojaroni hal etish jarayoniga xalaqit bermaganini ta’kidladi.
Fransiyaning Evian-le-Ben shahrida bo‘lib o‘tgan «Katta yettilik» (G7) sammiti doirasidagi matbuot anjumanida Donald Tramp Xitoy raisi Si Szinpin va Rossiya prezidenti Vladimir Putinning Eron bilan bog‘liq mojaro davomida neytral pozitsiyani egallaganini ta’kidladi.
«Men prezident Si Szinpinga minnatdorlik bildirmoqchiman. U mutlaqo neytral bo‘ldi va men buni qadrlayman. Vladimir Putin ham juda neytral pozitsiyada bo‘ldi. Ular vaziyatni biz uchun ancha murakkablashtirishi mumkin edi», — dedi Tramp.
AQSh prezidenti Xitoy va Rossiya mojaro jarayonida Eronni qo‘llab-quvvatlash uchun qo‘shimcha harbiy yordam ko‘rsatmaganini qayd etdi. Uning so‘zlariga ko‘ra, Pekin mojaroni hal etishda yordam berishga harakat qilgan.
«Ular katta miqdordagi qurol-yarog‘ yuborishi mumkin edi, biroq bunday qilmadi. Prezident Si menga yordam berdi. U vaziyatni hal qilishga ko‘maklashdi va menimcha, bu mojaroni bartaraf etishda muhim rol o‘ynadi», — dedi Tramp.
Trampning ushbu bayonotlari AQShning Yaponiya va Yevropadagi ittifoqchilari haqidagi avvalgi tanqidiy fikrlari fonida yangradi. U ilgari ayrim ittifoqchi davlatlarni Eron bilan bog‘liq harbiy operatsiyalar hamda Hormuz bo‘g‘ozida kemalar harakatini tiklash bo‘yicha sa’y-harakatlarda yetarlicha faol bo‘lmaganlikda tanqid qilgan edi.
Shu bilan birga, Vashingtondagi Xitoy elchixonasi vakili Pekinning pozitsiyasi doimiy bo‘lib qolayotganini va Xitoy mojaroni to‘xtatish hamda tinchlikka erishish yo‘lida faol harakat qilayotganini ma’lum qildi. Rossiyaning AQShdagi elchixonasi esa hozircha Trampning bayonotlariga munosabat bildirmadi.
Eslatib o‘tamiz, avvalroq AQSh va Eron kelishuv bandlari va unda kim yutgani haqida yozgan edik.
