O‘zbekiston milliy terma jamoasi bosh murabbiyi Fabio Kannavaro murabbiy sifatida jahon chempionatida ishtirok etish futbolchi bo‘lishdan butunlay farq qilishini aytdi. Uning fikricha, futbolchi turnirdan ko‘proq zavq olishi mumkin, murabbiy esa har bir detal, har bir qaror va har bir vaziyat uchun mas’uliyatni his qiladi.
Kannavaroning ta’kidlashicha, murabbiy sifatida juda ko‘p narsaga e’tibor qaratish, ko‘plab jarayonlarni nazorat qilish va o‘yinga har tomonlama tayyorgarlik ko‘rish kerak bo‘ladi. Albatta, bunday musobaqada hayajon va baxt hissi bor, biroq yakunda butun e’tibor jamoaga qaratiladi. Shu sababli murabbiy atrofdagi ko‘p narsalarni sezmay qolishi ham mumkin.
Kolumbiyaga qarshi o‘yindan olingan saboq
Kannavaro Kolumbiyaga qarshi uchrashuvdan keyingi eng katta saboq sifatida yuqori darajadagi futbol xatolarni kechirmasligini ta’kidladi. Uning fikricha, O‘zbekiston terma jamoasi yaxshi o‘yin ko‘rsatgan, jamoaviy harakat qilgan, agressiv va intizomli bo‘lgan. Ammo bu darajada bir lahzalik e’tiborsizlik ham raqib tomonidan jazolanishi mumkin.
Murabbiy birinchi gol oldindan tayyorlangan vaziyatlardan keyin urilganini aytdi. Jamoa bunday holatlarga uzoq vaqt tayyorgarlik ko‘rgan bo‘lsa-da, baribir xatoga yo‘l qo‘ygan. Ikkinchi gol esa autdan keyingi vaziyatda yuzaga kelgan. Kannavaroning so‘zlariga ko‘ra, u futbolchilarga markaz orqali o‘ynamaslik kerakligini alohida aytgan, chunki bu juda xavfli hudud hisoblanadi.
Shu bilan birga, bosh murabbiy ikkinchi bo‘limdagi o‘yindan mamnun qolganini bildirdi. U futbolchilardan to‘p jamoa nazoratida bo‘lganida o‘z uslubini ko‘rsatishni, futboldan qo‘rqmaslikni, o‘ziga ishonishni va o‘yindan zavq olishni talab qilgan. Ikkinchi bo‘limda jamoa aynan shuni namoyish etdi: o‘yinni nazorat qilishga urindi, gol urdi va yana gol urish imkoniyatlariga ega bo‘ldi.
Kannavaro uchinchi gol jamoa uchun juda og‘ir bo‘lganini yashirmadi. Uning fikricha, O‘zbekiston bunday o‘yinlardan tajriba olishi va eng yuqori darajada xatolar sonini kamaytirishi kerak. Chunki jahon chempionatida har bir epizod natijaga ta’sir qilishi mumkin.
Portugaliyaga qarshi o‘yinda asosiy vazifa — intizom
Fabio Kannavaro Portugaliyaga qarshi o‘yin oldidan futbolchilaridagi bosimni kamaytirishga harakat qilayotganini aytdi. Uning ta’kidlashicha, O‘zbekiston jahon chempionatining eng kuchli jamoalaridan biriga qarshi maydonga tushadi. Portugaliya tarkibi yulduz futbolchilarga boy, ayniqsa Ronaldo so‘nggi 20 yil davomida Lionel Messi bilan bir qatorda dunyoning eng buyuk futbolchilaridan biri bo‘lib kelmoqda.
Murabbiy Portugaliya to‘pni nazorat qilishni yaxshi ko‘radigan jamoa ekanini qayd etdi. Ular qisqa paslar orqali o‘yinni boshqaradi, raqibga bosim qilish imkonini bermaydi va har bir vaziyatda xavf tug‘dira oladi. Shu sababli O‘zbekiston himoyada juda intizomli bo‘lishi kerak.
Kannavaroning fikricha, bunday raqibga qarshi faqat himoyalanish yetarli emas. To‘p O‘zbekiston futbolchilarida bo‘lganida ular Portugaliyaga muammo tug‘dirishga harakat qilishi lozim. Har bir jamoaning kuchli va zaif tomonlari bor, shuning uchun O‘zbekiston raqibning kuchli jihatlarini cheklab, zaif tomonlaridan foydalanishga intilishi kerak.
Ronaldo haqida gapirar ekan, Kannavaro portugaliyalik futbolchi buyuk yulduz ekanini tan oldi. Ammo o‘yin boshlanganidan keyin bunday holatlarni unutish kerakligini aytdi. Uning fikricha, maydon tashqarisida futbolchilar o‘rtasida yaxshi munosabat bo‘lishi mumkin, biroq maydonda do‘stlik chetga suriladi. O‘yin vaqtida har bir futbolchi faqat o‘z jamoasi manfaatini o‘ylashi shart.
Avvalroq «Kursiv» O‘zbekiston – Portugaliya uchrashuvini marokashlik hakamlar boshqarishi haqida yozgan edi.
