Sanoat xavfsizligi sohasida akkreditatsiya olish tartibi o‘zgardi
O‘zbekistonda sanoat xavfsizligi sohasidagi ekspert tashkilotlarini akkreditatsiyadan o‘tkazish bo‘yicha davlat xizmatini ko‘rsatishning yangi tartibi belgilandi. Bu haqda Adliya vazirligi ma’lum qildi.
Murojaat qilish tartibi
Reglamentga ko‘ra, talabgorlar davlat xizmatidan foydalanish uchun Davlat xizmatlari markazi, Yagona interaktiv davlat xizmatlari portali (my.gov.uz) yoki «Yagona integratsiyalashgan ekotizim» axborot tizimi orqali murojaat qilishi mumkin.
Arizaga ilova qilinadigan hujjatlar
Talabgor quyidagi hujjatlarni taqdim etishi lozim:
- akkreditatsiya sohasi hamda ushbu yo‘nalishda ishlash uchun sanoat xavfsizligi bo‘yicha ekspertlar bilan ta’minlanganlik haqidagi ma’lumotlar;
- ekspert tashkilotining nizomi;
- akkreditatsiya mezonlariga muvofiqlik to‘g‘risidagi deklaratsiya;
- sifatni boshqarish tizimining muvofiqlik sertifikati;
- boshqa zarur hujjatlar.
Arizani ko‘rib chiqish va baholash
Vakolatli organ ariza qabul qilingan kundan boshlab 20 ish kuni ichida taqdim etilgan hujjatlarni tahlil qiladi. Shundan so‘ng, vakolatli organ buyrug‘i bilan tuziladigan baholash komissiyasi talabgor faoliyatini joyiga chiqqan holda baholaydi.
Akkreditatsiya attestati
Agar baholash dalolatnomasi ijobiy bo‘lsa, u rasmiylashtirilgan kundan boshlab 10 ish kuni ichida akkreditatsiya attestatini berish to‘g‘risida qaror qabul qilinadi. Akkreditatsiya attestati 5 yil muddatga beriladi.
Eslatib o‘tamiz, avvalroq avtomobillar uchun haydovchilar soni cheklanmagan sug‘urta joriy etilishi haqida yozgan edik.
