O‘zbekiston va Kongo uchrashuvida kiritilgan Eldor Shomurodovning goli FIFA tomonidan jahon chempionati guruh bosqichidagi eng chiroyli gol deb topildi.
FIFA rasmiy sahifasida «Hyundai Goal of the Tournament» loyihasi doirasida birinchi bosqich g‘olibi sifatida Eldor Shomurodov nomi ko‘rsatildi. Ushbu bosqich 28–30-iyun kunlari o‘tkazilgan ovoz berish natijalariga ko‘ra yakunlangan.
FIFA Shomurodovning golini O‘zbekistonning jahon chempionatidagi debyutida alohida ajralib turgan epizod sifatida baholadi.
«Dyuymdek aniqlikdagi oshirma zarba: mahorat bilan yaratilgan va nozik ijro etilgan ushbu gol O‘zbekistonning debyut jahon chempionatidagi yorqin lahzasiga aylandi», — deyiladi FIFA izohida.
Shomurodov Kongo DRga qarshi bahsda raqib darvozasini chiroyli uslubda ishg‘ol qilgan edi. FIFA sahifasidagi ma’lumotga ko‘ra, ushbu uchrashuvda O‘zbekiston 3:1 hisobida g‘alaba qozongan.
O‘zbekiston terma jamoasi sardori FIFA tomonidan o‘tkazilayotgan «Turnirning eng yaxshi goli» mukofoti uchun ovoz berishning dastlabki bosqichida yetakchi bo‘ldi. Oldinda yana bir necha bosqichli ovoz berish jarayonlari o‘tkaziladi va yakunda butun turnirning eng yaxshi goli aniqlanadi.
Eslatib o‘tamiz, Kursiv Uzbekistan Shomurodovning goli eng chiroyli gollar ro‘yxatiga kiritilgani haqida yozgan edi.
