Tashiyev davlat to‘ntarishiga urinish ishi bo‘yicha to‘rt yilga hukm qilindi
Qirg‘iziston Davlat milliy xavfsizlik qo‘mitasining sobiq raisi Qamchibek Tashiyev «75 oqsoqol maktubi» ishi bo‘yicha to‘rt yilga ozodlikdan mahrum qilindi. Hukm 2-iyul kuni Bishkekdagi Pervomay tuman sudida e’lon qilindi.
Ma’lumotlarga ko‘ra, sud Tashiyevga nisbatan probatsiya nazoratini qo‘lladi, shu sababli u jazoni qamoqxonada o‘tamaydi. Ishning asosiy figurantlari sifatida Qamchibek Tashiyev, Jogorku Keneshning sobiq spikeri Nurlanbek Turgunbek uulu va sobiq bosh prokuror Kurmankul Zulushev ko‘rilgan. Sud ularni to‘rt yilga ozodlikdan mahrum qilish va mol-mulkini musodara etish haqida hukm chiqardi. Shu bilan birga, ularga ham probatsiya qo‘llandi.
Tashiyevga ikki modda bo‘yicha ayblov qo‘yilgan edi: hokimiyatni zo‘ravonlik bilan egallashga tayyorgarlik ko‘rish va mansab vakolatini suiiste’mol qilish. Sud ikkinchi modda bo‘yicha uni aybsiz deb topdi. Biroq hokimiyatni zo‘ravonlik bilan egallashga tayyorgarlik ko‘rish ayblovi bo‘yicha u oqlanmadi.
Sud qaroriga ko‘ra, Tashiyev uch yil davomida probatsiya nazorati ostida bo‘ladi. Bu uning ozodlikda qolishini, biroq belgilangan nazorat tartibiga rioya qilishi kerakligini anglatadi. Hukmga muvofiq, uning mol-mulki musodara qilinishi kerak.
Yana kimlar bor?
Fevral oyidan beri hibsda saqlanayotgan besh nafar sudlanuvchi — Aali Karashev, Bekbolot Talgarbekov, Kurmanbek Dыykanbayev, Kursan Asanov va Emilbek Uzakbayev sud zalidan ozod qilindi. Ularning barchasiga nisbatan ham to‘rt yillik ozodlikdan mahrum qilish jazosi va probatsiya nazorati qo‘llangan.
Bu birinchi instansiya sudi qarori hisoblanadi va tomonlar hukm ustidan apellyatsiya berishi mumkin. Sud majlisidan keyin Tashiyevning advokati Ikramidin Aytkulov hukmni yaqin vaqt ichida shikoyat qilishini bildirgan. Sobiq bosh prokuror Kurmankul Zulushevning advokati Baktybek Jumashev ham himoyasidagi shaxs sud qaroriga rozi emasligini ma’lum qilgan.
Avvalroq «Kursiv» Tashiyev ishi bo‘yicha sudda maxfiy kelishuv ayblovlari rad etilgani haqida yozgan edi.
