SAIC Motor tarkibidagi MG brendi yangi MG 07 fastbek-liftbekining interyeri va texnik arxitekturasi haqida ma’lumot berdi. Elektromobil uchun oldindan buyurtmalar 29-iyuldan boshlanishi kutilmoqda.
MG 07 uzunligi 4886 mm, kengligi 1900 mm, balandligi 1485 mm bo‘lgan kuzovga ega. G‘ildirak bazasi 2825 mm’ni tashkil qiladi. Modelda clamshell uslubidagi kapot, egri chiziqli old chiroqlar va faol havo kirish panjarasi qo‘llangan.
Salon oq, binafsha va to‘q ko‘k ranglarda taklif etiladi. Ichki qism markazida 15,6 dyuymli 2,5K ekran joylashgan. Multimedia tizimi Qualcomm Snapdragon 8295P protsessori asosida ishlaydi va mobil qurilmalar bilan keng integratsiyani qo‘llab-quvvatlaydi. Sun’iy intellektga asoslangan salon moduli namlik va haroratni kuzatib, asosiy o‘rindiq sozlamalarini avtomatik moslashtiradi.
Texnik imkoniyatlar
Bagaj bo‘limi hajmi 697 litrni tashkil qiladi, pastki qo‘shimcha bo‘lim esa yana 109 litr joy beradi. MG 07 sof elektr versiyada 800 voltli yuqori kuchlanishli platforma asosida qurilgan. Tizim 5C tezkor quvvatlashni qo‘llab-quvvatlaydi, maksimal yurish zaxirasi esa CLTC sikli bo‘yicha 840 km ga yetadi. Bu ko‘rsatkich avval ishlab chiqarish liniyasidan chiqqan 650 km yurish zaxirasiga ega bazaviy versiyadan yuqori.
Modelning plagin-gibrid varianti ham bo‘ladi. U 82 kVt quvvatli 1,5 litrli atmosferali benzin dvigateli va old o‘qqa o‘rnatilgan 152 kVt quvvatli elektromotor bilan jihozlanadi. 30 kVt/soat sig‘imli CATL-SAIC qo‘shma korxonasi ishlab chiqargan litiy-temir-marganes-fosfat batareyasi WLTC sikli bo‘yicha 185 km gacha sof elektr yurish imkonini beradi.
Elektromobil 0 dan 100 km/soatgacha 5 soniya ichida tezlanishi aytilmoqda. Yurish qulayligi uchun mCDC elektromagnit osma tizimi qo‘llangan bo‘lib, u soniyasiga 200 marta sozlash kiritadi. Tizim sun’iy intellekt yordamida yo‘l yuzasini 15 metrdan 150 metrgacha oldindan skanerlab, notekisliklarga moslashadi.
Eslatib o‘tamiz, Kursiv Uzbekistan nashri MG 07 avtomobilining yangi dizayni fosh bo‘lgani haqida yozgan edi.
